काठमाडौं । ठमेलमा व्यवसायीले एक वर्षसम्म घर भाडामा ५० प्रतिशतसम्म छूट पाउने भएका छन् । पर्यटकीय क्षेत्र ठमेलका व्यवसायी र घरधनीबीच ६ महिनादेखि एक वर्षसम्म ५० प्रतिशत घरभाडामा छुट दिने समझदारी भएको हो । पर्यटन क्षेत्रका २२ संस्थाले यस्तो जानकारी गराएका हुन् ।

कोभिड–१९ महामारीको कारण देशकै प्रमुख पर्यटकीय क्षेत्र ठमेलका व्यवसायी पलायन हुने जोखिम बढेपछि घरधनी भाडा छूट गर्न सहमत भएका हुन् । ठमेलमा दुई सय ७० कोठा तथा सटर खाली भइसकेको ठमेल पर्यटन विकास परिषद्ले उल्लेख गरेको छ ।

ठमेल क्षेत्रका तीन सय ५० व्यवसायी र घरधनीबीच भाडा छुटमा समझदारी भइसकेको बताइएके छ । लकडाउनपछि ठमेल सुनसान छ । ठमेल नेपालको अन्तर्राष्ट्रिय चिनारी समेत भएको र पर्यटन व्यवसाय जीवन्त राख्न यस्तो निर्णय भएको व्यवसायीले बताएका छन् ।