काठमाडौं । अन्तर्राष्ट्रिय श्रम सङ्गठन (आईएलओ) ले गैरआवासीय नेपाली सङ्घ (एनआरएनए) लाई चार लाख २४ हजार डलर (करीव पाँच करोड १० लाख रुपैयाँ) अनुदान उपलब्ध गराउने भएको छ । विदेशमा अफ्ठ्यारोमा रहेको नेपालीलाई घर फिर्ति अभियानमा खर्च गर्न तथा कोरोना भाइरसविरुद्ध लड्न अन्तर्राष्ट्रिय श्रम सङ्गठनले एनआरएनएलाई रकम दिने सम्झौता भएको हो ।

एनआरएनएका अध्यक्ष कुमार पन्तका अनुसार यो रकम खासगरी मलेसिया, यूएई, कतार र साउदी अरब गरी चार देशका नेपालीलाई सहयोग गर्न उपयोग गरिने भएको छ । कोरोनाले श्रम बजारमा पारेको प्रभाव र श्रमिकको हितका विषयमा अध्ययन गर्न समेत यो रकम उपयोग गरिने भएको छ ।

अध्यक्ष पन्तका अनुसार सम्बन्धित देशमा रहेका नेपाली कुटनीतिक नियोगमार्फत रकम परिचालन हुनेछ । अहिले विभिन्न मुलुकबाट नेपालीलाई घर फर्काउने अभियान जारी छ । अहिलेसम्म करीव १७ हजार नेपाली घर आइसकेका छन् ।