काठमाडौं । नेपाल कम्यूनिष्ट पार्टी (नेकपा)को स्थायी समिति बैठक आजका लागि बोलाइएको छ । यसअघि शुक्रबार बोलाइएको बैठक विवादले उग्र रुप लिएसँगै स्थगित भएको थियो । बैठक अगाडी अध्यक्षद्धय केपी शर्मा ओली र प्रचण्डबीच निर्णायक वार्ता हुने बताइएको छ । उक्त वार्ता निष्कर्षमा पुग्न सके विवाद समाधान हुनेछ । नत्र पार्टी फूटको जोखिममा रहेको निष्कर्षमा स्वयम नेकपाका नेताहरु पुगिसकेका छन् ।

प्रधानमन्त्री केपी शर्मा ओली र अध्यक्ष पुष्पकमल दाहाल (प्रचण्ड)बीच आइतबार भएको वाताले कुनै निष्कर्ष निकाल्न नसकेपछि आज फेरी बैठक बस्ने निर्णय भएको छ । सहमतिका लागि प्रयास गर्ने सहमति सहित आइतबारको बैठक टुंगिएको थियो ।

प्रधानमन्त्री र पार्टी अध्यक्ष प्रधानमन्त्री ओलीले सरकार एकलौटी चलाएको, नेताहरुको मानमर्दन हुने गरी अभिव्यक्ति दिएको भन्दै पार्टी भित्रै उनको राजिनामा माग भइरहेको छ । अध्यक्ष दाहाल, वरिष्ठ नेता माधव कुमार, झलनाथ खनाल र बामदेव गौतम एकातर्फ छन् भने ओली अर्को पक्षमा छन् ।

सोहीकारण अहिले प्रधानमन्त्री ओली एक्लिएका छन् । पार्टीमा एक्लिएका उनले विपक्षी दल कांग्रेससँग हिमचिम बढाउन थालेपछि झन आलोचना बढेको छ । कांग्रेस नेता गगन थापाले जनताले दुई तिहाई बहुमतको साथ दिएको ५ वर्ष एकै पार्टीले सरकार चलाउन दिएको आदेश भएको भन्दै सरकार परिवर्तनको खेल घृणित भएको बताइसकेका छन् । सोहीकारण तत्काल कांग्रेसले समेत ओलीलाई साथ दिने सम्भावना कम छ ।