सियोल । उत्तर कोरियाले कोरोना भाइरसको संक्रमण भित्रिएको आंशका गर्दै सिमा नाका बन्द गरेको छ । एक जनामा कोभिड – १९ सङ्क्रमणको आशङ्का गरिएपछि उत्तर कोरियाले दक्षिण कोरियाको सीमानाका सिल गरेको अन्तराष्ट्रिय समाचार संस्थाहरुले उल्लेख गरेका छन् । दक्षिण कोरियासँग सीमा जोडिएको केसङ्ग सहरको सीमा सिल गरिएको हो ।

उत्तर कोरियाली नेता किम जोङ उनले देशमा सङ्कटकाल समेत घोषणा गरेका छन् । उनले आपतकालिन रुपमा पोलिट ब्युरो बैठक आह्वान गरेका छन् । उत्तर कोरियाली सरकारी समाचार एजेन्सी केसीएनका अनुसार किम जोङ उनले विषालु भाइरस आफ्नो मुलुकमा समेत प्रवेश गरेको बताएका छन् । उनका अनुसार यदि सङ्क्रमणको आशङ्का गरिएका मानिसमा कोरोना पुष्टि भए यो आधिकारिक रुपमा उत्तर कोरियामा पहिलो सङ्क्रमण हुने बताइएको छ ।

किनकी उत्तर कोरियाले अहिलेसम्म कोरोनाबाट सुरक्षित रहेको दावि गर्दै आएको छ । तर पश्चिमा मुलुक भने उत्तरको यो दावि स्वीकार गर्ने पक्षमा छैनन् । चीन र दक्षिण कोरियाको नजिक रहेको मुलुक कोरोनाबाट सुरक्षित रहन असम्भव भएको बताउने गरेका छन् । उता, दक्षिण कोरियामा समेत कोरोनाले महामारीको रुप नलिएका कारण उत्तरको दावि सही हो भन्ने जनमत समेत देखिन्छ ।