कोलम्बो । कोरोना महामारीका बीच श्रीलंकामा संसदीय निर्वाचन सम्पन्न भएको छ । निर्वाचनमा प्रधानमन्त्री महिन्दा राजपाक्षको पार्टी श्रीलंका पोडुजना पार्टी (एसएलपीपी) लाई स्पष्ट बहुमत प्राप्त भएको छ । निर्वाचन अन्तिम नतिजा शुक्रबार सार्वजनिक गरिएको छ । नतिजा अनुसार कुल २२५ सीटमा भएको निर्वाचनमा एसएलपीपीले १४५ सिटमा जित प्राप्त गरेको छ ।

निर्वाचनमा ७५ प्रतिशत मतदाताले मताधिकार प्रयोग गरेका छन् । एसएलपीपीको प्रमुख प्रतिपक्षी दलले ५४ सिटमा जित प्राप्त गरेको हो । अब प्रधानमन्त्री महिन्दा राजपाक्षले सोही पदको लागि आफ्नै भाइबाट शपथ ग्रहण गर्नेछन् । प्रधानमन्त्रीका भाइ गोटाभाय राजपाक्ष श्रीलंकाका राष्ट्रपति छन् ।

राष्ट्रपति गोटाभय राजपाक्षले सामाजिक सञ्जाल ट्वीटरमार्फत निर्वाचनमा आफ्नो समृद्धिको योजनालाई आगामी दिनमा वास्ताविकतामा ढाल्न सक्ने विश्वासका साथमा मतदान भएको बताएका छन् । उता, आलोचकले भने राजपाक्ष दाजुभाइले अहिले पाएको अधिकार दुरुपयोग गर्दै प्रहरी र न्यायालयलाई पनि आफ्नो हातमा लिन सक्ने आशंका व्यक्त गरेका छन् । उनीहरुले राष्ट्रपतीय कार्यकालमाथिको अंकुश पनि हटाउन सक्ने आशंका गरेका छन्