काठमाडौं । कोरोना भाइरस सङ्क्रमणबाट नेपाल बाहिर मात्र हालसम्म १९१ जना नेपालीको ज्यान गएको छ । गैरआवासीय नेपाली सङ्घले संकलन गरेको तथ्यांक अनुसार यो साता भारतमा थप दुई जना नेपालीको मृत्यु भएको छ । सङ्घ मातहतको स्वास्थ्य समितिका संयोजक डा सञ्जीव सापकोटाका अनुसार यो साता भारत, अष्ट्रेलिया, बेल्जियम, पोल्याण्ड, फ्रान्स, कतार, साउदी अरेबियामा रहेका नेपालीमा थप सङ्क्रमण भएको छ । गत साताको तुलनामा मध्यपूर्वका देशहरु कतार, युएई, साउदी अरबलगायतमा कोरोना सङ्क्रमणको दर घटेको छ ।

अष्ट्रेलिया रहेका १४६ नेपालीमा नयाँ सङ्क्रमण थपिएको छ । उता, लग्जेम्वर्गमा रहेका नेपाली भने सङ्क्रमणमुक्त बनेका छन् । विश्वका ३८ देशमा रहेका नेपालीहरु कोरोना भाइरसबाट सङ्क्रमित भएका छन्। तीमध्ये १६ देशमा रहेका नेपालीको कोरोनाका कारणले निधन भएको छ।

कोरोना भाइरसका कारण बेलायत, युएई, साउदी अरब, बहराइन, कुवेत, कतार, आयरल्याण्ड, जापान, टर्की, नेदरल्याण्ड र स्वीडेन, भारत, नेपाल, साउथ अफ्रिकालगायतका देशमा रहेका नेपालीको ज्यान गएको हो । नेपालसहित विदेशमा रहेका ५५ हजार ९२५ जनामा कोरोना सङ्क्रमण देखिएको छ। ती मध्ये ४७ हजार ४३७ जनाले कोरोनालाई जित्न सफल भएका छन् ।