काठमाडौं । सरकारले अन्तर जिल्ला यातायात र बाह्य तथा अन्तरिक हवाई उडानमाथिको प्रतिवन्ध थप १५ दिने लब्याउने निर्णय गरेको छ । अब यी सेवा भदौ १६ बाट मात्र संचालनमा आउनेछन् । यसअघि ५ साउनमा बसेको मन्त्रिपरिषद् बैठकले १ भदौबाट यी सेवा थाल्ने निर्णय गरेको थियो । तर, कोरोना भाइरसले महामारीको रुप लिने देखिएपछि पुनः प्रतिवन्ध लम्ब्याइएको हो ।

मन्त्रिपरिषदको सोमबार बसेको बैठकले कोभिड—१९ संकट व्यवस्थापन सेन्टर (सीसीएमसी)को सिफारिसअनुसार १ भदौबाट खुला गर्ने भनिएको क्षेत्र थप १५ दिन नखोल्ने निर्णय गरेको छ ।

अब अन्तर जिल्ला यातायात, बाह्य तथा अन्तरिक हवाई उडान तथा विद्यालय भर्ना लगायतका गतिविधि पर सरेको हो । अब खेलकुद प्रशिक्षण, विद्यार्थी भर्ना, शैक्षिक तथा अन्य परीक्षा जस्ता कार्य पनि भदौ १५ सम्म स्थगित भएका छन् । सरकारले भारतबाट आउने नेपालीका लागि तोकिएका प्रवेश बिन्दु २० बाट १० मा झारेको छ । अब सीमाना पूर्ण सिल हुनेछ ।