भरतपुर । चितवनमा मंगलबार बिहान थप १७ जनामा कोरोना भाइरसको संक्रमण भेटिएको छ । भरतपुर अस्पताल कोभिड–१९ परीक्षण प्रयोगशालामा सोमबार आएको नतिजा अनुसार चितवनका १५, मकवानपुरका एक र पूर्वी नवलपरासीको गैँडाकोटका एक जनामा कोरोना संक्रमण भेटिएको हो । संक्रमिता भरतपुर महानगरपालिका भित्रै ९ जना भेटिएको ल्यावले जनाएको छ ।

श्रीपुष्पाञ्जली हस्पिटलमा उपचाररत भरतपुर–३ का ५१ वर्षीय पुरुषमा कोरोना पोजेटिभ पाइएको हो । ६ जनाको स्वाव भने पुरानो मेडिकल कलेज र नारायणी सामुदायिक अस्पतालबाट संकलन गरिएको हो । संक्रमितहरु राप्तीको क्वारेन्टिनमा रहेका व्यक्ति रहेको बताइएको छ ।

पुरानो मेडिकल कलेजमा उपचाररत मकवानपुरको हेटौंडाकाकी ३८ वर्षीया महिला र पूर्वी नवलपरासीको गैँडाकोटकी ५२ वर्षीया महिलामा कोरोना संक्रमण पुष्टि भएको छ । अब चितवनमा कोरोना संक्रमितको संख्या ३ सय ८३ पुगेक‍ो छ । पछिल्लो समय पोखराबाहेक अन्य सबै जसो महानगरपालिका कोरोना भाइरसको चपेटामा आएका छन् ।