काठमाडौं । सरकारले लकडाउन र कोरानो महामारीका बीच गैरआवासीय नेपालीका लागि समेत नेपाल आउने ढोका खोलेको छ । तर, सबै गैरआवासीय नेपाली भने नेपाल आउन पाउने छैनन् । सम्बन्धित मुलुकस्थित नेपाली कुटनीतिक नियोगको सिफारिसमा मात्र उनीहरुलाई नेपाल आउने अनुमति मिल्नेछ ।

तर, सिफारिस लिने कन्डिसन भने विशेष मात्र तोकिएको छ । कुनै पनि गैरआवासीय नेपालीको एकाघरको आफन्त गम्भीर बिरामी रहेको वा घरको कुनै सदस्यको मृत्यु भएको अवस्थामा मात्र विदेशबाट गैर आवासीय नेपालीलाई नेपाल आउने अनुमति मिल्नेछ ।

पहिलो चरणमा सरकारले मंगलबारबाट नियमित हवाई उडान खोल्दैछ । यसक्रममा नेपाली नागरिक र कुटनीतिक नियोगमा कार्यरत कर्मचारी तथा पदाधिकारीलाई मात्र नेपाल आउने अनुमति दिइनेछ । यसबाहेक विदेशी साझेदार कम्पनीका कर्मचारी र प्रतिनिधिले समेत नेपाल आउने अनुमति पाउने छन् ।

तर, गैरआवासीय नेपालीबाट पनि नेपाल आउन पाउनु पर्ने दवाव सरकारमाथि दिइएको थियो । सोहीअनुसार गैरआवासीय नेपालीका लागि आंशिक रुपमा खुला गर्ने अनुमति दिइएको हो । उता, नेपाल आउन दिइने अनुमतिमा समेत दैनिक संख्या बढाइएको छ । यसअघि दैनिक ५ सय यात्रुलाई काठमाडौं आउन अनुमति दिने भनिएकोमा अब भने ८ सय मानिसलाई अनुमति दिइएको छ ।