लण्डन । अक्सफोर्ड विश्व विद्यालयले कोरोना भाइरस विरुद्धको खोप परीक्षणको काम स्थगित गरेको छ । पहिलो र दोस्रो चरणमा उत्साहजनक नतिजा आएको परीक्षण तेश्रो चरणमा पुगेपछि रोकिएको छ । बीबीसीका अनुसार परीक्षणका दौरान एक जना व्यक्ति विरामी भएपछि तत्कालका लागि परीक्षण रोक्ने निष्कर्षमा विश्वविद्यालय पुगेको छ ।

अक्सफोर्डले एस्ट्राजेनेसँग मिलेर खोप निर्माणको काम गरिरहेको छ । विश्वभर परीक्षणका काम भइरहँदा यहाँ प्राप्त सफलताले उत्साह थपेको थियो । एस्ट्राजेनेकै सल्लाहमा रोकिएको र यो नियमित काम भएको बताइएको छ । परीक्षणमा सामेल व्यक्ति विरामी हुनुको कारण पत्ता लागेपछि पुनः परीक्षणको काम अगाडी बढ्ने बताइएको छ ।

अक्स्फोर्डको खोप विश्वका अन्य स्थानको तुलनामा छिटो बजारमा आउने अपेक्षा समेत गरिएको छ । अक्स्फोर्डको खोपको तेस्रो चरणको परीक्षण ३० हजार मानिसमा भइरहेको अन्तर्राष्ट्रिय संचारमाध्यमले लेखेका छन् । यो संसारका थुप्रै मुलुकमा एकै पटक हुने गर्छ ।

सोहीकारण अहलिे संसारभर नै परीक्षण रोकिएको छ । अन्य कारणले मानिस बिरामी भएपनि परीक्षण भइरहेको मानिस बिरामी पर्दा परीक्षण रोकिनुलाई विज्ञहरुले भने सामान्य प्रक्रिया मानेका छन् ।