भरतपुर । चितवनमा करेन्ट लागेर दुई सैनिकको ज्यान गएको छ । चितवनको कालिका नगरपालिका–८ शक्तिखोरमा रहेको सिंहनाथ गणमा रुख काट्ने क्रममा करेन्ट प्रवाह हुँदा ज्यान गएको चितवन प्रहरीले जानकारी दिएको छ । कार्यालय कम्पाउण्डभित्र रहेका रुखको हाँगा काट्ने क्रममा करेन्ट लागेको र त्यसक्रममा गम्भीर घाइते भएका उनीहरुलाई उपचारका क्रममा अस्पताल लैजादै मृत्यु भएको हो ।

घटनामा सुवेदार राजुबाबु श्रेष्ठ र सिपाही राजन कुमालको ज्यान गएको हो । आज बिहान ११ बजेतिर रुखको हाँगा काट्दा बिजुलीको नांगो तारले रुखमा छुँदा उनीहरुलाई करेन्ट लागेको बताइएको छ । चितवनमा अघिल्लो साता पनि एक माछा पोखरीको डिलमा लगाइएको तारमा छुँदा करेन्ट लागेर दुई जनाको मृत्यु भएको थियो ।