काठमाडौं । संयुक्त राष्ट्र संघीय खाद्य कार्यक्रम (डब्लुएफपी)ले संसारभर ३० करोड मानिस भोकमरीमा रहेको भन्दै सहयोगको अपिल गरेको छ । कार्यक्रमका प्रमुख प्रमुख डेभिड बेस्लेले संसारभर अर्बपतिसँग यस्तो सहयोगको अपिल गरेका हुन् । उनले अर्बपतिहरुसँग सहयोगको याचना गर्दै भोका व्यक्तिहरुका लागि सहयोग आवश्यक रहेको बताए ।

संयुक्त राष्ट्र सुरक्षा परिषदमा उनले भोका व्यक्तिलाई समयमै सहयोग गर्न नसके उनीहरुलाई बचाउन समेत मुस्किल पर्ने चेतावनी उनले दिएका छन् । उनका अनुसार कोरोना भाइरसको संक्रमण र यसको विश्वव्यापी महामारीले पुनः संसारभर भोकमरीको समस्या बढेको छ । यसअघि विश्वभर झण्डै २७ करोड मानिस भोकै रहने गरेको तथ्यांक थियो ।

यसमा महामारीयता १३ दशमलब ८ प्रतिशतको वृद्धि देखिएको उनले उल्लेख गरेका छन् । उनले भोकमरीसँग जुधिरहेका व्यक्तिलाई एक वर्षका लागि खाद्यान्नको व्यवस्था गर्न करीव ५ बिलियन डलर आवश्यक रहने आंकडासमेत प्रस्तुत गरेका छन् ।