काठमाडौं । कोरोना भाइरसको संक्रमणको जोखिमसँगै लागेको विदेशी नागरिक प्रवेशमाथिको प्रतिवन्ध ओमानले हटाएको छ । नयाँ प्रावधान भने १ अक्टोबरबाट लागु हुने भएको छ । अब ओमानले विदेशी आप्रवासी कामदारलाई प्रवेश अनुमति दिने घोषणा गरेको हो । यसले त्यहाँ कामको सिलसिलामा जाने नेपाली समेत लाभान्विन हुने भएका छन् ।

किनकी नेपाल सरकारले समेत अब वैदेशिक रोजगारीमा जानेका लागि सबै गन्तब्य खुला गरिसकेको छ । ओमानको कोभिड १९ सम्बन्धी सर्वोच्च समितिको २२ सेप्टेम्बरको निर्णय अनुसार आगामी १ अक्टोबर बाट लागु हुने गरी नेपाल लगायत विदेशबाट ओमान फर्किन सक्ने नीति ल्याएको हो ।

ओमानस्थित नेपाली दूतावासले यसको पुष्टी गरेको छ । दूतावासका अनुसार ओमान फर्किन चाहने कामदारले साबिकमा लिनुपर्ने परराष्ट्र मन्त्रालयबाट जारी हुने एप्रुभल लेटर समेत अब भने लिनु पर्ने छैन । ६ महिनाभन्दा बढी अवधि ओमान बाहिर रहनेको हकमा कम्पनीले फर्किन अनुमति दिएको कागजात ‘नो अब्जेक्शन लेटर’ चाहिन्छ ।