समाचार

असार भित्रै खोलानालामा बहाव बढ्ने, सतर्क रहन सूचित

काठमाडौं । सरकारले खोला तथा नदी किनारका स्थानीयलाई पानीको बहाव बढ्ने भएकाले सचेत रहन सूचित गरेको छ ।

असार २८ पछि नदी तथा खोला किनारमा पानीको वहाव बढ्ने भन्दै बाढी पुर्वानुमान महाशाखाले बाली नाली समेत त्यस अगाडी नै स्याहार्न सुचित गरेको छ ।

ऊर्जा जलस्रोत तथा सिंचाइ मन्त्रालय मातहतको महाशाखाले शनिबार उक्त सूचना जारी गरेको हो । नदी किनारमा विकास निर्माणको काममा संलग्नलाई उच्च सतर्कता अपनाउन समेत आग्रह गरेको छ ।

अहिले नदीहरुमा जलको स्तर बढ्ने क्रममा रहेको र क्रमशः एक साता भित्र धेरै नदीको पानीको वहाव बढ्ने अनुमान सरकारले गरेको छ ।

शनिवारदेखि खासगरी मझौला र ठुला नदीमा पानीको बहाव बढ्ने भएको हो । शुक्रबारदेखि देशभर पानी समेत परेको छ ।

तराई भेगमा परेको पानीले गर्मीबाट आहात नागरिकलाइ केही हदसम्म भएपनि राहत दिएको छ ।

डडेलधुरा, डोटी, कैलाली, कञ्चनपुर, बर्दिया, बाँके, दाङ, सुर्खेत, दैलेख, जाजरकोट, अछाम र आसपास जिल्लाका चुरे र पहाडका साना नदीमा पानीको चाप बढ्ने महाशाखाले उल्लेख गरेको छ ।

मौसम विज्ञान विभाग, मौसम पूर्वानुमान महाशाखाका अनुसार शनिबार देशभर बदली भई पश्चिम र पूर्वी भागमा हल्कादेखि मध्यम खालको वर्षा हुनेछ ।