ओखलढुंगा । ओखलढुङ्गामा बुधबार बिहानै भएको बस दुर्घटनामा तीन जनाको मृत्यु भएको प्रहरीले जनाएको छ। दूर्घटनामा परी अन्य १७ जना घाइते छन्।
झापाको काँकडभिट्टाबाट सोलुखुम्बु तर्फ जाँदै गरैको मे १ ख १८९१ नम्बरको बस बिहान साढे ३ बजे सिद्धिचरण राजमार्गस्थित ओखलढुङ्गाको मानेभञ्ज्याङ, डडुवामा दुर्घटनामा परेको थियो ।
ओखलढुङ्गा प्रहरीका अनुसार मृत्यु हुने यात्रुको सनाखत भइसकेको छैन । दूर्घटनामा परी दुई पुरुष र एक महिलाको निधन भएको छ ।
दूर्घटनामा परी गम्भीर ४ जनालाई काठमाडौं पठाइएको र १३ जनाको स्थानीय अस्पतालमै उपचार भइरहेको प्रहरीले जानकारी दिएको छ ।
बस घुम्तीबाट तल्लो सडक खण्डमै झरेको थियो । करीव २० मिटर तल खसेर दूर्घटनामा परेको बसले सडक खण्ड नै अवरुद्ध पारेको र त्यसलाई पन्छ्याएर सडक सूचारु गर्ने प्रयास भइरहेको प्रहरीले जानकारी दिएको छ ।
