काठकाडौं । अबैध २ किलो सुनसहित एक जना पक्राउ परेका छन् । महानगरीय प्रहरी प्रभाग नागढुंगाबाट रसुवा जिल्ला गोसाईकुण्ड गाउँपालिका वडा नं ५ स्याफ्रुबेशी घर भएका १७ वर्षीय भिमबहादुर तामाङ पक्राउ परेका हुन् ।

उनलाई नागढुंगामा प्रहरीले पक्राउ गरेको जानकारी छ । महानगरीय प्रहरी बृत्त थानकोटका प्रमुख कुमार बिक्रम थापाले गोप्य सूचना पाएपछि चेकजाँचका क्रममा उनलाई पक्राउ गरिएको जानकारी दिए ।

भैरहवाबाट काठमाडौंतर्फ आउँदै गरेको लु २ ख ६५२ नम्बरको यात्रुबाहक बसमा सुन रहेको गोप्य सूचना प्रहरी समक्ष आएको र चेकजाँचका आधारमा दुई केजी सुन सहित पक्राउ गरिएको प्रहरीले जानकारी दिएको छ ।

तामाङले कम्बरमा बाँधी ६ सेमि लम्बाई र ११ सेमि मादल आकारमा दुई किलो सुन बोकेको पाइएको थियो ।

तामाङ रसुवागढीबाट गल्छीसम्म आएर त्यहाबाट काठमाडौं आउने भैरहवाको बस चढेको प्रहरीको भनाई छ ।

पछिल्लो समय चीनबाट ठूलो परिमाणमा सुन भित्रिएको छ । तातोपानी नाका बन्द भएपछि सुन तस्करीका लागि यो नाका प्रयोग हुने गरेको छ ।