14-Nov-2019 | २८ कार्तिक २०७६, बिहीबार

न्यूयोर्कमा लिम्बूले धान्दैछन् परम्परा, सिसेक्वा तङ्नाम भव्यरुपमा मनाइयो

८ श्रावण २०७६, बुधबार ०   बिचार / प्रतिक्रिया


न्यूयोर्क । नेपाली आप्रवासीको बाक्लो बस्ती न्यूयोर्क अर्को नेपाल पनि हो । हजारौं माइल्स टाढा नेपाली भाषा, साहित्य, कला–संस्कृति, रीतिरिवाज र परम्परालाई न्यूयोर्कका नेपालीले भुलेका छैनन् र छुटाउने गरेकै छैनन् । नेपालभित्रै कतिपय जातजातिका मौलिक परम्परा नष्ट तथा लोप हुँदै छन् तर न्यूयोर्कमा प्रत्येक नेपाली चाडपर्व मनाइन्छ ।
त्यस्तै पर्वमध्ये एक हो– लिम्बू जातिले मनाइँदै आएको सिसेक्वा तङ्नाम । गत आइतबार न्यूयोर्कको तापक्रम १०० डिग्री माथि थियो, तर न्यूयोर्कका लिम्बूहरुलाई त्यो गर्मीको रापले सिसेक्वा तङ्नाम मनाउन छेकेन । परम्परागत लिम्बू भेषमा सजिएका महिला तथा पुरुषहरुलाई त्यो तापको परवाह नै थिएन । उनीहरु स्थानीय कुइन्स ब्रिजपार्कमा झिसमिसेमा नै भेला भइसकेका थिए । गर्मीले रैनाथे अमेरिकनहरु एयर कण्डिसनको कोठामा गुट्मुटिएका बेला न्यूयोर्कका लिम्बूहरु भने तागाबा र मेख्लीमा सजिएर दिनभर च्याबु्रङ नाच्दै थिए । विशेषगरी लिम्बू जातिले साउने संक्रान्तिको दिन पारेर मनाउने सिसेक्वा, तङ्नाम न्यूयोर्कमा प्रत्येक वर्ष मनाउने परम्परा नै बनिसकेको छ ।


किराँत याक्थुङ चुम्लुङ अमेरिकाका अध्यक्ष जोसिला युवा वीरेन्द्र हाङ्लाबुङको सभापतित्वमा सम्पन्न सिसेक्वा अतिथिका रुपमा माननीय उपसभामुख शिवमाया तुम्बाहाङ्फेको उपस्थिति पनि रहेको थियो । कार्यक्रममा चलचित्र निर्देशक नविन सुब्बा, किरात याक्थुङ चुम्लुङ नेपालका पूर्वअध्यक्ष तथा लिम्बुवान स्टडी सेन्टरका संयोजक तथा प्रोफेसर अर्जुन लिम्बू लगायत नेपाली वाणिज्य दूतावासका प्रतिनिधि, स्थानीय संघसंस्थाका प्रतिनिधि तथा पेशाकर्मीहरुको सहभागितामा अत्यन्त उत्साहजनक तरिकाले सिसेक्वा तङ्नाम मनाइयो । औपचारिक कार्यक्रमको साथमा दिनभरजसो डोरी तान्ने, म्युजिकल चियर, छेलोजस्ता खेलहरु खेलाएर मनोरञ्जन प्रदान गरिएको थियो ।

फेसबुकबाट तपाईको प्रतिक्रिया

सम्बन्धित समाचार