काबुल । अफगानिस्तानमा विवाह समारोह भइरहेको हल भित्रै आत्मघाती बम विस्फोट भएको छ ।

विस्फोटबाट भएको मानवीय हताहतीको विवरण सार्वजनिक नभइसकेको संचारमाध्यमले उल्लेख गरेका छन् ।

करीव १ हजार पाहुना बोलाइएको पार्टी हल भित्रै गराइएको बम विस्फोटबाट दर्जनौं मारिएको हुन सक्ने संचारमाध्यमले स्थानीय प्रशासन स्रोतलाई उदृत गर्दै लेखेका छन् ।

राजधानी काबुलको एक व्यस्त शहरमा हल भित्रै शनिबार राती विस्फोट भएको हो । स्थानीय समय अनुसार पौने ११ बजे राती घटना भएको संचारमाध्यमले लेखेका छन् ।

कैंयौं घाइतेलाई नजिकैको अस्पताल लैजादै गरेको देखिएको प्रत्यक्षदर्शीले बताएका छन् । घटनास्थलमा लासहरु देखिएपनि सरकारी अधिकारीहरुले त्यसको विवरण सार्वजनिक गरेका छैनन् ।

अफगानिस्तानमा यस्तो भेला तथा समारोह हुँदा महिला र पुरुषका लागि छुट्टाछुट्टै बस्ने व्यवस्था गरिएको हुन्छ ।

आत्मघाती विस्फोटक पुरुषतर्फको लाइनमा गएर गरिएको प्रत्यक्षदर्शीले संचारमाध्यमसँग बताएका छन् ।

बीबीसीका अनुसार यो विस्फोटको जिम्मेवारी भने कसैले पनि लिइसकेको छैन । अफगानिस्तानमा हुने यस प्रकारका घटनाले विश्व शान्तीलाई नै चूनौति दिइरहेको छ ।

एजेन्सी