काठमाडौं । नेपाल भ्रमण वर्ष २०२० का सिलसिलामा हरेक देशमा नेपाल डेस्क तथा स्थलको व्यवस्था गर्न मूल आयोजक समितिले गैरआवासीय नेपाली संघलाई आग्रह गरेको छ ।

मंगलबार राजधानीमा आयोजित नेपाल भ्रमण वर्ष मूल आयोजक समितिको बैठकले गैरआवासीय नेपाली संघलाई उक्त जिम्मेवारी तोकेको हो ।

‘अब हरेक मुलुकमा नेपाल डेस्क स्थापनाको पहल हामी परराष्ट्र मन्त्रालयमार्फत गर्छौ,’ मूल आयोजक समितिका अध्यक्ष तथा सस्कृति, पर्यटन तथा नागरिक उड्डयन मन्त्री योगेश भट्टराईले भने, ‘यसमा तपाईहरुले स्वयमसेवी खटाएर सहयोग गरिदिनुहोस ।’

मन्त्री भट्टराईको आग्रहलाई एनआरएनए अध्यक्ष भवन भट्टले समेत स्वीकार गरेका छन् ।

समितिले गैरआवासीय नेपाली संघसहितका सरोकारवालाले भ्रमण वर्षमा गर्न सक्ने योगदान तथा कार्यक्रम समेटेर १० दिन भित्र भ्रमण वर्षको सचिवालयमा पठाउन बैठकले निर्देशन दिएको छ ।

उक्त कार्यक्रम तथा प्रस्तावहरुको सम्बन्धमा १० दिन छलफल गरी १ असोजमा सम्बन्धित सरोकारवालासँग सम्झौता गरिने मन्त्री अधिकारीले उल्लेख गरे ।

एनआरएनए अध्यक्ष भवन भट्टले नेपाल भ्रमर्ण वर्ष सम्पन्न गराउन गैरआवासीय नेपाली कट्टीवद्द रहेको उल्लेख गरे ।

अतिथि देवो भवः अभियान जारी रहेको भन्दै उनले एक नेपाली ३ साथि नेपाल पठाउने गरी अभियान शुरु गर्न लागिएको उनले जानकारी दिए ।

नेपाली कूटनीतिक नियोगसँगको सहकार्यमा गैरआवासीय नेपालीले योगदान गर्ने उनको भनाई थियो ।