काठमाडौं । सरकारी व्यवस्थापनमा आगामी दशैंमा करीव ३ हजार खसी, बोका तथा च्यांग्रा काठमाडौंको बजारमा बिक्रि गरिने भएको छ ।

खाद्य व्यवस्थापन तथा व्यापार कम्पनी लिमिटेडले दशैँ लक्षित गरी उक्त संख्यामा खसी बोका ल्याउन लागेको बताएको छ ।

बजारमा माग भने यसको तुलनामा निकै धेरै हुन्छ । यस पटक मासुको भाउ अत्यधिक बढेको छ । जसले गर्दा आम मानिसलाई मंहगीको मार पर्ने निश्चित छ ।

यसबाट थोरै भए पनि बजार नियन्त्रण गर्न सरकारले खसी, बोका र च्याङ्ग्रा ल्याउन लागेको हो ।

निजी क्षेत्रको एकाधिकारका कारण बजारमा भाउ अत्यधिक भएपछि हरेक वर्ष सरकारले सस्तो मूल्यमा खसी बोका तथा च्यांग्रा ल्याएर बेच्ने गरेको छ ।

त्यसो त अन्य उत्पादनमा यस्तै हुन्छ । त्यसकारण दशै र तिहारको मूखमा सरकारले सुपथ मूल्यका पसलहरु संचलन गर्ने गर्छ ।

गत वर्ष सरकारले २ हजार खसी बोका र च्यांग्रा काठमाडौं ल्याइ बेचिएको थियो । यस वर्ष १ हजार बढी च्याङ्ग्रा ल्याउन लागिएको हो ।

काठमाडौंमा हिमाली भेगबाट च्यांग्रा ल्याइने छ । तराई भेगबाट भने खसी र बोका ल्याउने तयारी छ । यसको व्यवस्थापनका लागि बोलपत्र आह्वान समेत भइसकेको छ ।