भीमनारायण श्रेष्ठ / थानकोट

आजभोली दिनका दिन

खवर पत्रिकाहरुमा

छापेका हुन्छन्

बलात्कारका घटना

कतै बालिका बलात्कार

कतै किशोरी बलात्कार

कतै युवती बलात्कार

अझ कतै कतै त

महिला र बृद्धा समेतको

बलात्कार…

 

बलात्कार पनि अनेक

रुप र रङ्ग अनेक

कहिँ एकल बलात्कार

कतै सामुहिक बलात्कार

कतै त सहमतिमा सहवास

सहमति टुटेमा बलात्कार

अनि त

बलात्कारी माथि नै

मोलमोलाईको बलात्कार

फेरि अर्को

अपहरणमा बलात्कार

बलात्कार पछि

जघन्य हत्या र

हिंसाको अपराध

 

एउटा बलात्कारको घटना

सेलाउन नपाउँदै

फेरी अर्को बलात्कार

दिनहुँ जसो आइरहने

यस्तै खवर…

 

कति होलान् अझ

खवरमा आउन नपाउँदै

डर, धम्की, आश र त्रासको

मिलोमतोमा सेलाउँछन्

धैर्यको बाँध नफुन्जेल

हुन्छन् बेखवर

बलात्कार…

 

खवरमा छाएका

केही बलात्कारका घटना

न्यायिक कठघरामा उभ्याउन

जुरमुराउँछन्

जन आक्रोश

जन आवाज र जन दवाव

थेग्न नसकी सरोकार

केही हदसम्म साम्य पार्न

गठन गर्छन् सरकार

छानविन आयोग

 

छानविन नामको चरो

भुर्रर्र… उड्छन्

घटनास्थल पुग्छन्

छानविनको नाटक गर्छन्

बुझाउँछन् प्रतिवेदन

नाम मात्रको दस्ता

बलात्कारी को हो

थाहा छैन

दोषी को हो ?

उत्तर दिंदैन 

बस्,

यति मै सीमित

कलम अगाडि बढ्दैन

अगाडि बढ्न चाहँदैन आयोग

सायद…

कलमको नीब भाच्चिएर हो कि ?

अथवा; मसी सकिएर हो

 

नीव र मसीको

दोष कितान हुन नपाउँदै

उम्कन र उम्काउन सफल हुन्छन्

पूजिवादी बलात्कारी  

 

के गर्नु यहाँ

रक्षक नै भक्षक भएपछि

कसको के लाग्छ

जन आवाज र जन दवाव

अनि आक्रोश

आस्थाका आधारमा

मत्थर हुन्छन्

अझ भनौं

मत्थर पार्छन्

 

बलात्कार

यौन हिंसा

निन्दनीय व्यवहार

हो सामाजिक अपराध

गरौं आज चारैतिरबाट

खवरदार…

 

समाजमा व्याप्त

बलात्कारीका कुदृष्टी

पूँजिवादको गिद्धे नजर

बहिष्कार गरौं

बलात्कारीका कुदृष्टी

गिद्धे नजर

सुधार केन्द्रको

वन्दी गृहमा, नजर बन्दमा

कैद गरौं,

अनि

कालकोठरीमा कोचौं