काठमाडौं । त्रिभुवन अन्तर्राष्ट्रिय विमानस्थलमा अब आन्तरिक उडानतर्फ सम्माननीय उपाधि प्राप्त ६ जना अतिविशिष्ट व्यक्तिले मात्र जहाजसम्म आफ्नो सवारी साधन लैजान पाउने भएका छन् ।

भीआइपीका नाममा उक्त सुविधाको दूरुपयोग बढेपछि संस्कृति, पर्यटन तथा नागरिक उड्डयन मन्त्री योगेश भट्टराईले यस्तो नियम ल्याएका हुन् ।

नियम कार्यान्वयनमा आएको विमानस्थल कार्यालयले बिहीबार जानकारी गराएको छ ।

अब सम्माननीय उपाधी पाउने राष्ट्रपति, उपराष्ट्रपति, प्रधानमन्त्री, प्रधानान्यायाधिश, प्रतिनिधिसभाका सभामुख र राष्ट्रिय सभाका अध्यक्षले मात्र जहाजसम्म आफ्नो सवारी लगेर जहाजमा चढ्ने सक्ने सुविधा पाउने भएका छन् ।

अन्य सबै भीआइपीहरुले भने वायुसेवा कम्पनीले उपलब्ध गराउने गाडीमा चढेर टर्मीनलदेखि जहाजसम्म पुग्नु पर्ने भएको छ ।

यसबाट आम सर्वसाधारणकै भिडमा अब मन्त्री, पूर्वप्रधानमन्त्री तथा अन्य विशिष्ट व्यक्तिले बसमै यात्रा गरी जहाजसम्म चढ्नु पर्ने भएको विमानस्थल कार्यालयले स्पष्ट पारेको छ ।