न्यूयोर्क 

सफलताको कथा मार्मिक हुन्छ किनकि सफल बन्नका लागि गरिएको लामो संघर्षको फहरिस्ते त्योसँग जोडिएको हुन्छ । कथा; लगातार तेश्रो पटक पनि प्रतिष्ठित New York City’s Annual MoMo Crawl # Best Mo:Mo In Town को Trophy जित्न सफल ज्याक्सन हाईट्सस्थित नेपाली भान्छाघरको सफलताको । ५ वर्षअघि ४ जना मिलेर शुरु गरेको सामान्य खाजा रेष्टुरेण्टले आज बिदेशी मुलका धेरै खाना पारखीहरुको मन जित्न सफल भएको छ । नेपाली खानातर्फ बिदेशीलाई आकर्षित गर्ने अवस्था जुरेको छ, माहोल बनेको छ । शुरुका दिनमा ४ जना मिलेर शुरु गरेको नेपाली भान्छाघर आज बिमला हमाल श्रेष्ठ एक्लैले सञ्चालन गर्छिन् । ८ जना नेपालीले प्रबासमा रोजगार पाएका छन् । बिहान ५ बजे उठेर सरसामानको जोहो गर्छिन् । आवश्यक सरसामान खरिद गर्न आफै दौडन्छिन । खानाका परिकारहरु भ्याएसम्म आफै बनाउँछिन् । यी सबै परिदृष्य देखिरहँदा सफलताको सुत्र निरन्तर लगन र मेहेनत भन्न गाह्रो पर्दैन ।

स्याङजा वालिङमा रहेका परिवारलाई आवश्यक पर्ने खर्च पनि यतैबाट पुर्याएर जिम्मेवार आमाको भूमिकामा पनि निर्वाह गरेकी छिन् । बिदेशमा एक्लैले व्यवसाय गर्दा बिभिन्न कानून झैझमेलाहरु नपर्ने होईन तर उनी बिचलित नभै नेपाली जानकारहरुसँग राय लिन पुग्छिन् । सिस्टममा चलेको देशमा सिस्टम पछ्यायो भने नेपालमा भन्दा सजिलो हुने उनी आफ्नो अनुभव सुनाउँछिन् ।

उनी थप्छिन् “सबै नेपाली दाजूभाई दिदीबहिनीले माया गरेका छन् । आईदिनु हुन्छ, मिठो मानेर खाईदिनु हुन्छ ।कहिलेकाँही केही पैसा नपुग्दा पनि म केही भन्दिन । नभएर नतिर्दापनि समस्या बुझेर चुपचाप सहन्छु । भगवानको कृपा र सबैको आशिर्बादले व्यवसाय राम्रो चलेको छ ।” 

अहिले सञ्चालन गर्दै आएको स्थान अलि साँघुरो भएकोले आउँदो दशैं अगाडी नै थप व्यवस्थित र आवश्यक सुधार गरेर नजिकै भान्छा घर -२ (पुरानो चौतारी रेस्टुरेण्ट) लाई सञ्चालनमा ल्याउने तयारी गरेकोछ । ग्राहकहरुको मन जित्दै नेपाली खानाको लोकप्रियता अभिवृद्धि गर्न सफल भएकोमा शुभकामना ।