सेप्टेम्वर ३, कनेक्टिकट / धन लामा 

कनेक्टिकट नेपाली समाज (नेकोन) द्वारा विगत ८ वर्षदेखि गर्मीयाममा संचालित नेपाली भाषा पाठशालाको ८ औं दिक्षान्त भव्य समारोहका बीच अगष्ट ३१ तारिख स्थानीय चार्टरओक स्कूलमा सम्पन्न भएको छ । दुई वटा सत्रमा विभाजित पाठ्यक्रममा, पहिलो सत्रमा सुन्ने, बोल्ने, पढ्ने र लेख्ने क्षमतामा जोड दिईएको थियो भने, दोस्रो सत्रमा नेपाली वाद्यवाधन, नाता सम्बन्ध र नेपाली खानाका विविध परिकारहरुको विषयमा परिचय गराईएको थियो । लयात्मक संगीत र गीतको माध्यमबाट विद्यार्थीहरुलाई नेपाली भाषा र व्याकरणको क्षमता अभिवृद्धि गर्ने प्रयास गरिएको यस नेपाली भाषा शिक्षण कार्यक्रमलाई ५० भन्दा बढी नेकोनका सदस्यहरुले आर्थिक तथा भौतिक सहयोग उपलब्ध गराएका थिए । नेपाली भाषा पाठशालाका विद्यार्थीहरुका लागि नास्ता र खाजाको सम्पूर्ण व्यवस्था अभिभावकहरुले गरेका थिए भने नेपाली समुदायका सक्रिय सदस्यहरुद्वारा संचालित बम्बई अलिभ, टेस्ट अफ इन्डिया र बलिउड ग्रिल लगायतका रेस्टुरेन्टहरुले पनि यसको लागि योगदान दिएका थिए । शैक्षिक सत्रको अन्त्यमा हार्डफोर्ड काउन्टी एभरेस्ट सेन्टेनियल लायन्स क्लबसंगको सहकार्यमा विद्यार्थीहरुको आँखा जाँच शिविर समेत सन्चालन गरिएको यस सत्रमा ४ देखि १५ वर्ष उमेर समूहका ४९ जना विद्यार्थीहरुको सहभागिता थियो ।

पूर्णकालिन स्वयम् सेवक शिक्षक/शिक्षिकाहरुमा विरेन्द्र राउत, सबि श्रेष्ठ, लक्ष्मी ओझा र रुवी पराजुली हुनुहुन्थ्यो भने आंशिक स्वयम् सेवक शिक्षक/शिक्षिकाको रुपमा धन लामा, हरिश भट्ट, बसन्त स्टाईनर, पुष्पा जोशी भट्ट, केशव दाहाल, अर्जुन दाहाल र विमल गुरुंग लगायतले आफ्नो भूमिका निभाउनु भएको थियो । त्यस्तै गरी विद्यार्थीहरुको तर्फबाट निता बस्नेत, ज्योज्योलुङ राई, अंसुया दुलाल, समिक्षा पौड्याल, अलिस्का सापकोटा, विनोद जोशी, उकासे राउत, रुनिश निरौला, मिन्सो तुम्बाहांफे, अर्या थापा, मुकुन्द जोशी, रिजेश श्रेष्ठ, अमृता सापकोटा, कारमेल अधिकारी, डोना गुरुङ, सफल महत क्षेत्री र गौरव न्यौपानेले सकृय रुपमा स्वयम् सेवकको भूमिका निर्वाह गरेका थिए । न्यूयोर्कस्थित नेपाली वाणिज्यदूतावासका महावाणिज्यदूत श्री पुष्पराज भट्टराईको प्रमुख आतिथ्यमा सम्पन्न समारोहमा विद्यार्थीहरुद्वारा नेपाल र संयुक्तराज्य अमेरिकाको  राष्ट्रियगानका साथै नेपाली गीतहरु समेत प्रस्तुत गरेका थिए । विद्यार्थीहरुका तर्फबाट प्रत्यूष रेग्मी र कृश कुँवर, विद्यार्थी स्वयम् सेवकको तर्फबाट डोना गुरुङ र अभिभावकहरुको तर्फबाट नवीन खड्काले आफ्नो मन्तव्य राखेका थिए । विद्यार्थीहरुलाई कनेक्टिकट नेपाली समाज (नेकोन) को तर्फबाट प्रमाणपत्र र स्वयम सेवकहरुलाई कदर पत्र प्रदान गरिएको थियो ।

जुन महिनाको २९ तारिखदेखि अगस्ट महिनाको ३१ तारिख सम्म हरेक शनिवार ९ देखि ११ बजेसम्म संचालित यस भाषा कक्षाको संयोजक कनेक्टिकट नेपाली समाज (नेकोन) का उपाध्यक्ष जय कुमार राईले नेपाली भाषा पाठशालाको यस वर्षको सम्पूर्ण गतिविधीहरुमा आफ्नो व्यस्त समयको बाबजूद पनि खुल्ला हृदयले सहयोग गर्नु हुने सम्पूर्ण विद्यार्थी, स्वयम् सेवक, अभिभावक, सहयोगदाता तथा शुभचिन्तक महानुभावहरुलाई हार्दिक कृतज्ञता व्यक्त गर्नु हुँदै समाजका सम्पूर्ण सदस्यहरुलाई नेपाली भाषा संस्कृतिलाई संरक्षण गर्नको निम्ति त्यसको निरन्तर प्रयोगमा जोड दिनुका साथै समुदायको सामुहिक प्रयास र संलग्नताको महत्व माथि पनि प्रकाश पार्नु भएको थियो । कनेक्टिकट नेपाली समाजका अध्यक्ष जितेन्द्र बस्नेतको सभापतित्वमा सम्पन्न यस कार्यक्रमा प्रमुख अतिथी महावाणिज्यदूत पुष्पराज भट्टराईज्यूले यहाँको नेपाली समाजमा नेपाली भाषा र साहित्यमा भएको सचेताना प्रति खुशी व्यक्त गर्दै सामुदायिक भवनको आवश्यकताको बारेमा सचेत गराउनु भएको थियो । दिक्षान्त समारोहमा विभिन्न संघ संस्थाहरुका प्रतिनिधीहरुका साथै एनआरएनए कनेक्टिकट च्याप्टरका अध्यक्ष हरी प्रसाद जोशी र हार्डफोर्ड काउन्टी एभरेस्ट सेन्टेनियल लायन्स क्लबका अध्यक्ष माधव अात्रेयको पनि उपस्थिती थियो ।