काठमाडौं । विश्व फुटबलको सर्वोच्च निकाय (फिफा) वरीयतामा नेपाली फूटबलले आफ्नो स्थान सुधार गरेको छ ।

हालै विश्वकप छनोट अन्तर्गत भएको खेलमा चाइनिज ताइपेविरुद्ध जीत निकालेको नेपालले वरियतामा समेत सुधार गरेको हो ।

फिफाका अनुसार नेपाल पाँच स्थान माथि उक्लिएको छ । बिहीबार सार्वजनिक भएको नयाँ वरियता अनुसार नेपाल १६१औँ स्थानमा उक्लिएको छ ।

यसअघि नेपाल १६६औँ स्थानमा थियो। दक्षिण एशियाली वरीयतामा नेपाल तेस्रो स्थानमा रहेको छ। नेपालभन्दा बलिया भारत १०४औँ र माल्दिभ्स १५३औँ स्थानमा देखिएका छन् ।

नेपालभन्दा तल भूटान १८५औँ, बङ्गलादेश १८७औँ, श्रीलङ्का २०२औँ र पाकिस्तान २०३औँ स्थानमा रहेका छन् । पछिल्लो विश्व वरीयतामा शीर्ष स्थान भने बेल्जियमले ओगटेको छ ।

फ्रान्स दोस्रो र ब्राजिल तेस्रो स्थानमा छन् । इङ्ग्ल्याण्ड चौथो, पोर्चुगल पाँचौँ, उरुग्वे छैटौँ, स्पेन सातौँ, क्रोएसिया आठौँ, कोलम्बिया नवौँ र अर्जेन्टिना दशौँ स्थानमा रहेका छन्।