काठमाडौं । चाडबाडलाई लक्षित गरी राष्ट्र बैंकले शुक्रबारबाट नयाँ नोट सटही सुविधा शुरु गरेको छ ।

राष्ट्र बैंकको आफ्नै कार्यालय र बैंकका तोकेका विभिन्न बैंकका शाखाबाट नयाँ नोट वितरण हुने भएको छ । यस वर्ष सर्वसाधारणले १८ हजार ५ सय रुपैयाँ सम्म साट्न सक्ने गरी योजना ल्याइएको छ ।

त्यसअनुसार एक बण्डलमा १ सय, ५०, २०, १० र ५ रुपैयाँका १ \१ सय वटा नोट हुनेछन् । सर्वसाधारणका लागि काठमाडौंको बालुवाटार स्थित राष्ट्र बैंकको कार्यालयमा सटही सुविधा राखिएको छ ।

यसबाहेक कृषि विकास बैंक, नेपाल बैंक र राष्ट्रिय वाणिज्य बैंकका शाखाबाट नयाँ तथा सुकिला नोट साट्न सकिने भएको छ ।

अन्य बैंक तथा वित्तीय संस्थालाई पनि नयाँ नोट साट्न सक्ने अधिकार दिइएको छ । विराटनगर, वीरगञ्ज, जनकपुर, पोखरा, भैरहवा, नेपालगञ्ज र धनगढी कार्यालयबाट नयाँ नोट वितरण हुने भएको छ ।

यसैगरी काठमाडौंमा नेपाल बैंकको न्यूरोड, कीर्तिपुर, महाराजगञ्ज, जोरपाटी, पाटन औद्योगिक क्षेत्र, लाजिम्पाट र भक्तपुर शाखाबाट सटही हुने भएको छ ।

यसैगरी राष्ट्रिय वाणिज्य बैंकको सिंहदरबार प्लाजा, टेकु, नयाँ बानेश्वर, सानो थिमि, विशालबजार, नक्साल, कलंकि र बालाजु शाखाबाट पनि नयाँ नोट पाइने छ ।

कृषि विकास बैंकको गौशाला, कोटेश्वर, रामशाहपथ, रत्नपार्क, स्वयम्भु र रत्नपार्क शाखाबाट पनि सर्वसाधारणले नयाँ नोट सटही सुविधा पाउने राष्ट्र बैंकले जनाएको छ ।