काठमाडौं । गैरआवासीय नेपाली संघ (एनआरएनए) वैशाख २०७२ को भूकम्पबाट क्षतिग्रस्त गोरखाको लाप्राकस्थित एकीकृत बस्ती निर्माण नसकिदै जिम्मेवारीबाट पन्छिएको छ ।

गोरखा भूकम्पको केन्द्रिविन्दु पनि हो । सबैभन्दा बढी क्षती पुगेको यो वस्तीलाई दुई वर्षमा ठडाउने भन्दै एनआरएनएले यसको जिम्मेवारी लिएको थियो । यसबीचमा दुई कार्यकाल फेरीए, ४ वर्ष बित्यो, तर वस्ती निर्माणको काम सकिएको छैन ।

तर, एनआरएन भने जिम्मेवारीबाट भने हटिसकेको छ । एनआरएनएले २७ असोजबाट एनआरएनए लाप्राकको बस्ती निर्माणबाट अलग हुने निर्णय गरेको हो ।

राष्ट्रिय पुनर्निर्माण प्राधिकरण, एनआरएनए र धार्चे गाउँपालिकाबीच एक सम्झौता भएको छ । जसअनुसार लाप्राकको बस्ती पुनर्निर्माणबाट एनआरएनए बाहिरिएको छ ।

एनआरएनएले ५ सय ७३ घर बनाउन जिम्मेवारी लिएर काम थालेको थियो । घरहरु निर्माण भएपनि फिनिसिंगको काम बाँकि छ । अन्य अत्यावश्यक पूर्वाधार बनिसकेका छैनन् ।

आर्थिक कारण देखाउँदै एनआरएनले भने जिम्मेवारीबाट पन्छिएको हो ।

सम्झौता अनुसार अब आवश्यक पूर्वाधार निर्माण गर्न आवश्यक लागतको अध्ययन गर्न प्राधिकरण, एनआरएनए र गाउँपालिकाका प्रतिनिधि रहेको प्राविधिक टोली निर्माण गरिएको छ । त्यसका आधारमा थप निर्णय हुने बताइएको छ ।