काठमाडौं

एक जना नेपालीले पर्वतारोहणको ईतिहासमा नयाँ किर्तिमान राखेका छन् । ३६ बर्षीय निर्मल पुर्जाले १८९ दिन भित्र विश्वका १४ वटा अग्ला हिमश्रृंखलाको सफल आरोहण सम्पन्न गरी नयाँ किर्तिमान राखेको हो । पुर्जाले ८ हजार मिटर माथिका १४ वटा हिमाल आरोहण गर्ने क्रममा मंगलवार चिनको सिसपङ्मा हिमालको आरोहण सफलता  पूर्वक सम्पन्न गरेपछि विश्वमा उनको नयाँ किर्तिमान कायम भएको हो । आरोहण गरिएका १४ वटा हिमश्रृंखलाहरु मध्ये सिसपङ् अन्तिम हिमश्रृंखला थियो ।

यस अगाडिको १४ वटा हिमश्रृंखला आरोहण सम्वन्धि विश्व रेकर्ड ७ बर्ष १० महिना ६ दिनको थियो । यो रेकर्ड दक्षिण कोरियाका पर्बतारोही किम चाङ् होले सन् २०१३ मा बनाएका थिए । नेपालका पुर्जाले दक्षिण कोरियाका किमको रेकर्डलाई तोडेर नयाँ रेकर्ड  बनाएका हुन् । पुर्जाको पर्बतारोहणको सम्पूर्ण सामग्री ब्यबस्थापन गरेका सेभेन समिटका मिङ्मा शेर्पाले संचार माध्यमलाई बताए अनुसार पुर्जाको स्वास्थस्थिती राम्रो रहेको र चुचुरोबाट सफलता पूर्वक तल झर्न सफल भएका छन् । पर्बतारोही पुर्जा ब्रिटिश सेना हुन् । उनी सन् २००३ मा ब्रिटिश सेनामा भर्ती भएका थिए ।  

यसै बर्षको अप्रिल २३ मा नेपालमा रहेको माउन्ट अन्नपूर्ण, धौलागिरी मे १२, कन्चनजंगा मे १५, सगरमाथा मे २२, लोत्से हिमाल मे २२, मकालु मे २४, मनास्लु सेप्टेम्बर २७ मा आरोहण गरेका थिए ।  चिनमा रहेको माउन्ट चो यु सेप्टेम्बर २३, माउन्ट सिसपङ्को आरोहण अक्टुबर २९ मा गरेका हुन् ।

पुर्जाले यसै बर्ष खिचेको सगरमाथा आरोहणको क्रममा चुचुरो भन्दा केही तल आरोहीहरुको ट्राफिक जाम भएको दृष्यको तस्विर विश्वभर चर्चित भएको थियो ।