काठमाडौं । सन् २०२१ का लागि डाइभर्सिटी भिसा (डिभी) कार्यक्रममा सहभागी हुन फारम भर्ने समय सकिएको छ ।

यस वर्षदेखि अमेरिकाले डीभीमा पासपोर्टको विवरण अनिवार्य गरेपछि एक महिनाको अवधिमै हजारौं नयाँ पासपोर्ट थपिएका छन् । एक महिनाको अवधीमा २१ हजार ३ सय ४० जनाले दू्रत गतीमा नयाँ पासपोर्ट निकालेका छन् ।

यो प्रक्रियाबाट धेरै रकम तिरेर छिटो पासपोर्ट निकाल्न सकिन्छ । डिभी खुलेको एक महिनाको अवधिमा कूल ३८ हजार २ सय ७२ आवेदन प्राप्त भएको राहदानी विभागको तथ्यांकमा उल्लेख छ ।

त्यसमध्ये आधाभन्दा बढी नेपालीले फास्ट ट्र्याक माध्यमबाट पासपोर्ट निकालेका छन् । यसको मतलव ती पासपोर्ट डीभीको प्रयोजनका लागि निकालिएका थिए ।

यस वर्षबाट डिभी भर्दा पासपोर्ट नम्बर र पासपोर्टको एक्सपायर डेट अनिवार्य लेख्नु पर्ने प्रावधान ल्याइएको थियो । अमेरिकामा स्थायी बसोबासका लागि जाने लोभमा धेरै नेपालीले डीभी भर्छन् । तर, आफूले सोचेजस्तो नभएपछि धेरै नेपाली अमेरिका पुगेपछि पनि सन्तुष्ट भने देखिदैनन् ।