डडेलधुरा । अनसनरत डा. गोविन्द केसीलाई अस्पतालमा सारिएको छ । स्वास्थ्य अवस्था प्रतिकूल बन्दै गएपछि उनलाई शुक्रबार अनसनस्थलबाट अस्पतालमा सारिएको हो ।
उनी जिल्ला अस्पताल नजिकै रहेको एक घरमा अनसन बसेका थिए । उनी बसेको घरमा निजी क्लिनिक रहेको छ । नेपालको चिकित्सा क्षेत्रमा व्यापक सुधारको माग गर्दै उनी १७ औं पटकको अनसनमा बसेका छन् ।
सरकारले विगतमा गरेका सहमति कार्यान्वयनको माग उनको रहेको छ । खासगरी चिसोका कारण उनको स्वास्थ्य अवस्था कमजोर बन्दै गएको बताइएको छ । उनी सोमबारबाट अनसनमा बसेका हुन् । केसी अनसनमा बसेपनि सरकारले वार्ताको पहल अझै गरेको छैन ।
