काठमाडौं । स्टार खेलाडी सन्दीप लामिछानेलाई दिल्ली क्यापिटलले आगामी सिजनको आइपीएलका लागि समेत निरन्तरता दिएको छ । दिल्लीले आफ्नो टीमबाट यसपटक पनि सन्दीपलाई रिलिज गरेन ।
यससँगै उनी लगातार तेस्रो वर्ष दिल्लीबाटै आइपीएल खेल्ने भएका छन् । आइपीएल खेल्ने सन्दीप एक्लो नेपाली खेलाडी हुन् । दिल्लीका भरपर्दा लेगस्पीनर सन्दीपले अहिले विश्वका सबैजसो लीगमा निक्र राम्रो मूल्यमा स्थान पाइरहेका छन् ।
दिल्लीले शुक्रबार टीमको पहिलो सेट सार्वजनिक गरेको छ । जहाँ तीन जना विदेशी र ११ जना भारतीय खेलाडी छन् । सन्दीपका साथै कागिसो रबाडा र केमो पल विदेशी खेलाडी हुन् ।
सन्दीपले पहिलो पटक २०१८ को आइपीएलमा डेब्यू गरेका हुन् । सन् २०१९ मा सोही क्लवबाट प्रतिस्पर्धा गरेका उनी तेस्रो पटक दिल्लीको मूख्य खेलाडीका रुपमा मैदानमा उत्रने भएका छन् ।
