काठमाडौं । उत्तर कोरियाली नागरिकले नेपालमा गरेको लगानी फिर्ता गरेका छन् । नेपाल सरकारको उनीहरुलाई नेपालबाट आफ्नो लगानी फिर्ता लैजान पटक पटक समय दिएको थियो ।

अब सबै उत्तर कोरियाली लगानीकर्ताले लगानी फिर्ता लिएर नेपाल छाडिसकेको उद्योग विभागले जानकारी दिएको छ । यससँगै सरकारले संयुक्त राष्ट्रसंघको नेपाल कार्यालयमा पत्र पठाउँदै नेपालबाट उत्तर कोरिायली लगानी फिर्ता गएको बताएको हो ।

नेपालमा रहेको उत्तर कोरियाली लगानी फिर्ता पठाउन अमेरिका र राष्ट्रसंघको दवाव नेपालमाथि थियो । त्यसपछि सरकारले ताकेता शुरु गरेको हो ।

उत्तर कोरियाको आणविक हतियार र क्षेप्यास्त्र कार्यक्रमका कारण उसको लगानी विश्वभर अमान्य मानिन्छ । सोही दवाव नेपाल सरकारमाथि पनि परेको हो ।

नेपालमा १८ करोड ६५ लाख ४९ हजार नेपाली रुपैयाँ बराबरको उत्तर कोरियाली लगानी रहेको विभागको तथ्यांक छ । आतिथ्य सेवामा उत्तर कोरियाली नागरिकले नेपालमा लगानी गरेका थिए ।