काठमाडौं । कतार विश्वकप २०२२ का लागि नेपाल र कुवेतबीच छनोट प्रतियोगिताको दोस्रो लेग मंगलबार हुँदैछ । पहिलो लेगमा नेपाल पराजित भइसकेको छ ।

दोस्रो खेल जीत्दै त्यसको बदला लिने मौका नेपालसँग रहेको छ । भुटानको राजधानी थिम्पुस्थित चाग्लिमिथाङ रंगशालामा नेपाल र कुवेतबीच मंगलबार दिउँसो २ः४५ बाट खेल शुरु हुँदैछ ।

पहिलो लेगमा कुवेतले नेपाललाई ७ गोल हानेको थियो । नेपालका मुख्य प्रशिक्षक योहान कालिनले कुवेतविरुद्ध जीतका लागि मैदानमा उत्रने बताएका छन् ।

यद्दपी नेपाललाई मूख्य खेलाडीले खेलको मुखमा देखाएको अनुशासनहित गतिविधि र उनीहरुमाथि भएको कारवाहीको असर भने पक्कै देखिने छ ।

नेपालका मूख्य स्ट्राइकर विमल घर्तिमगरसहित ४ खेलाडी ठमेलको डान्सबारे गई मदिरामा मात्तिकएको र मदिरा सेवनकै कारण मोटरसाइकल दूर्घटना समेत पारेको भेटिएपछि एन्फाले उनीहरुलाई तत्कालन निलम्बन गरेको छ ।

४ जना मूख्य खेलाडीको अभाव बिर्साउने गरी नेपालले खेल्नु पर्ने भएको छ । खेल तालिका अनुसार नेपालले आफ्नो घरेलु मैदान दशरथ रंगशालामा खेल्नु पर्ने थियो । त्यसबेला नेपाली टोलीको साथमा दर्शकको साथ उत्तिकै हुने थियो ।

तर, रंगशाला निर्माण हुन नसकेपछि खेल भुटानमा सारिएको हो । यसको क्षति नेपालको प्रदर्शनमा पर्न सक्छ । नेपालको टीममा अभिषेक रिजाल, नवयुग श्रेष्ठ र भरत खवासमध्ये एकले मूख्य स्ट्राइकरको रुपमा बिमल घर्तिमगरका स्थान लिनेछन् ।

मिडफिल्डको जिम्मा सुनिल बल, विक्रम लामा, रवि पासवान, मिक्चेन तामाङ, रोहित चन्द, सुजल श्रेष्ठ, तेज तामाङ र सुवास गुरुङले सम्हाल्नेछन् ।

अनन्त तामाङ, देवेन्द्र तामाङ, सुमन अर्याल, सरोज दाहाल, अजित भण्डारी र रञ्जित धिमालले डिफेन्स सम्हाल्दा कप्तान किरण चेम्जोङसँगै विकेश कुथु र विशाल श्रेष्ठले गोलकिपरको भूमिका निभाउने छन् ।

उनीहरुमध्ये टोलीमा पर्ने अन्तिम ११ भने खेलको केही मिनेट अगाडी मात्र तय हुनेछ ।