अमेरिका
राष्ट्रपति डोनाल्ड ट्रम्प विरुद्ध अमेरिकी संसदको तल्लो सदन हाउस अफ रिप्रिजेन्टेटिभमा सुरु भएको महाभियोगमा नयाँ नयाँ सूचना छरिन थालेका छन् । साक्षीहरुसँग खुला बयान सुरु भएसँगै नयाँ सूचना सार्वजनिक हुने क्रम बढेको हो ।

अहिलेसम्म रिपब्लिकन सभासदहरुले ट्रम्प बचाउको आफ्ना पुराना तर्कहरु छोडेका छैनन् । तर, नयाँ प्रमाण र सूचनाहरुले पार्टीभित्र तरंग सिर्जना गर्न थालेको समाचार अमेरिकी मिडियाहरुले ब्रेक गर्दै आएका छन् ।

एक महिना बढिसम्मको गोप्य बयान र सुनुवाई पश्चात गत साता खुला बयान सुरु भएको हो । पहिलो चरणमा तीन जनाले बयान दिएका छन् । युक्रेन स्थित अमेरिकी राजदूताबासका प्रमुख विलियम टेलर, स्टेट डिपार्टमेन्टका डेपुटी एसिस्टेन्ट सेक्रेटरी जर्ज केन्ट एवं युक्रेनका लागि पूर्व राजदूत मारिया योभानोभिचको खुला बयान गत साता भएको हो । उनीहरुले तीनै जनाले अमेरिकी संसदले युक्रेनका लागि पारित गरेको सुरक्षा सहायता प्रशासनले रोक्नु गलत कदम भएको बताए । साथै उक्त प्रकरणमा राष्ट्रपति डोनाल्ड ट्रम्पको संलग्नताबारे पनि आफुले जानेको सूचना उनीहरुले अमेरिकी जनतासमक्ष प्रष्ट पारिदिएका छन् ।

यो साता मंगलबार दुई सत्रमा गरि चार जना अधिकारीहरुको खुला बयान सकिएकौ छ । मंगलबार बिहान लेफ्टिनेन्ट कर्णेल एलेक्जेन्दर भिन्डमान र उपराष्ट्रपति कार्यालयकी वैदेशीक सेवा सहकर्मी जेनिफर विलियम्सको बयान भएकाे हाे । भिन्डमानले राष्ट्रपति ट्रम्प र उनका युक्रेनी समकक्षी भोलोडिमिर जेलेन्स्कीसँगको गत जुलाई २५ को फोनकल प्रत्यक्ष सुनेका थिए । ह्वाइट हाउसले सार्वजनिक गरेको फोनवार्ताको ‘स्क्रिप्ट’ यथार्थपरक नरहेको समेत उनकाे भनाइ छ । उनीसँगै बयानमा सहभागी भएकी विलियम्सले पनि जुलाई २५ को फोनवार्ता सुनेकी थिइन् ।

मंगलबार दिउँसो भने रिपब्लिकनको चाहना बमोजिमको बयान भयो । तर, त्यस अनुरुप रिपब्लिकनलाई एकपक्षिय सहयाेग पुग्ने गरि भने उक्त बयान हुन सकेन । बयानका लागि युक्रेनका लागि पूर्व विशेष दूत कर्ट भोल्कर र पूर्व रसिया विज्ञ टिम मोरिसनलाई निम्त्याइएको हो । उनीहरुले दुबै जनाले ट्रम्पले युक्रेनका लागि दिन लागेको सहायता रोक्नु आफुहरुका लागि स्वाभाविक कदम नभएकाे बताएका छन् । साथै ट्रम्पले विदैशीसँग आफ्ना राजनीतिक प्रतिश्पर्धी माथि अनुसन्धानकाे माग राख्नु पनि गलत रहेको उनीहरुको भनाइ थियो ।

बुधबार बिहान भने युरोपियन युनियनका लागि अमेरिकी राजदूत गोर्डन सोन्डल्याण्डको बयान हुनेछ । उनले गोप्य बयानमा ट्रम्पले युक्रेन प्रकरणमा कुनै दवाव दिएको आफुलाई सम्झना नभएको बताएका थिए । तर, पछि लिखित विवरण पठाउँदै वयान सच्याएका थिए । ट्रम्पकै इसारामा युक्रेनको सैन्य सहायता रोकिएको प्रसंग आफुलाई ‘सम्झना’ भएको भन्दै उनले आफ्नो बयान सच्याएका थिए । त्यती हुँदा पनि उनको भनाइ अझै केही साक्षीहरुसँग बाझिएको छ । त्यसैले बुधबार थप सच्याउने हुन् या कानूनी अफ्ठ्यारो झेल्ने हुन् भन्नेबारे मिडिया पण्डितहरुको बहस चलि रहेको छ । सोन्डल्याण्डले ट्रम्पको सपथ ग्रहण समारोहका लागि १० लाख डलर चन्दा दिएका थिए । त्यही कारण उनलाई ट्रम्पले राजदूत नियुक्त गरेका थिए ।

बुधबार दिउँसो भने अमेरिकी रक्षा विभागका एसिस्टेन्ट सेक्रेटरी लाउरा कुपर र स्टेट डिपार्टमेन्टका अन्डर सेक्रेटरी डेभिड हलको बयान हुनेछ । यस्तै अहिलेसम्म विहिबारका लागि नेशनल सेक्युरिटी काउन्सिलका टप रसियन विज्ञ फिओना हिल र स्टेट डिपार्टमेन्टका सहकर्मी डेभिड होल्मेसको बयान तर्जुमा गरिएको छ ।

ट्रम्पको निर्देशनमा अमेरिकाले युक्रेन लाई दिने झन्डै चार सय मिलियन डलरको सैन्य सहायता रोकिएको थियो । ट्रम्पले युक्रेनबाट पूर्व उपराष्ट्रपति एवं डेमोक्रेटिक नेता जो बाइडेन माथिको छानविन अपेक्षा गरेको र त्यो नहुन्जेल सहायता रोकेको सूचनाका आधारमा महाभियोग प्रकृया सुरु भएको थियो । उक्त आरोप अहिले क्रमशः पुष्टि हुने चरणमा छ । यो साताको बयानमा थप सूचना छताछुल्ल हुने अपेक्षा गरिएको छ ।

यसैबीच सभामुख न्यान्सी पिलोसीले ट्रम्पले महाभियोग प्रकृयामा आफ्नो भनाइ राख्न चाहे लिखित बयान दिन सक्ने बताएकी छिन् । ट्रम्पले जवाफमा आफु त्यसरी बयान दिन तयार रहेको भन्दै ट्विट गरेका छन् । हाउसमा सुरु भएको महाभियोग प्रकृया नै गैर कानूनी रहेको र त्यसलाई वैधानिकता नदिन आफुले ह्वाइट हाउसका अधिकारीलाई बयान दिनबाट रोकेको बताउने ट्रम्प आफुँ चाहिँ किन लिखित जवाफ दिन मन्जुर छन् भन्ने तथ्य पनि खुलेको छैन ।

यसैबीच महाभियोग सम्बन्धि सर्भेक्षणमा ट्रम्पले गल्ती गरेको बताउने अमेरिकी नागरिकको संख्या पनि बढेको छ । सोमबार सार्वजनिक भएको एबिसी टेलिभिजनको सर्भेक्षण अनुसार ७० प्रतिशत अमेरिकीले आफ्ना राजनीतिक प्रतिद्वन्दीलाई विदेशी गुहारेर विवादित बनाउन खोज्नु ट्रम्पको गल्ती रहेको बताएका हुन् । साथै सर्भेक्षणमा सहभागि ५१ प्रतिशतले ट्रम्पलाई महाभियोग मार्फत वर्खास्त गर्नु पर्ने बताएका छन् ।