काठमाडौं । काठमाडौं उपत्यकामा अचाक्ली महंगी बढेको छ । नेपाल राष्ट्र बैंकको तथ्यांक अनुसार चालु आर्थिक वर्षको पहिलो त्रैमासिक अवधिमा काठमाडौं उपत्यकामा मूल्य वृद्धि ८ प्रतिशत भन्दा माथि पुगेको छ ।

गत आवको पहिलो त्रैमासिकमा मात्र ४ प्रतिशत मूल्य वृद्धि थियो । यस वर्ष भने आवको प्रारम्भमै नागरिकको ढाड सेक्ने गरी महंगी बढेको छ ।

तथ्यांक अनुसार असोजसम्म उपभोक्ता मुद्रास्फिति ८.१४ प्रतिशत पुगेको छ । तराईमा ५.७५ प्रतिशत, पहाडमा ४.८९ प्रतिशत र हिमालमा ५.११ प्रतिशतले महंगी बढेको छ ।

समग्रमा भने उपभोक्ता मुद्रास्फिति ६.२१ प्रतिशत रहेको तथ्यांक राष्ट्र बैंकले सार्वजनिक गरेको छ ।

समिक्षा अवधिमा खाद्य तथा पेय पदार्थ समूहअन्तर्गत तरकारी, मासु तथा माछा, फलफूल र मसला उपसमूहको मूल्य बढि रहेको छ ।

गैरखाद्य तथा सेवा समूहतर्फ घरायसी उपयोगिताका वस्तु तथा सेवा, कपडा तथा जुत्ता र शिक्षा उपसमूहको मूल्य बढेको देखिएको छ ।