भरतपुर । नियमित मर्मत सम्भारका लागि आइतबारदेखि चितवनस्थित भरतपुर विमानस्थल बन्द भएको छ । विमानस्थल २४ मंसिरसम्म बन्द हुने नेपाल नागरिक उड्डयन प्राधिकरणले जानकारी दिएको छ ।
विमानस्थलको धावनमार्ग मर्मतसम्भार गर्नुपर्ने भएकाले विमानस्थल बन्द गर्न लागिएको हो । यो विमानस्थल पर्यटकको सुविधाका लागि निकै महत्वपूर्ण रहेको किनकी ।
यहाँबाट काठमाडौंमा मात्र नभई पोखरामा समेत उडान हुन्छ । यो विमानस्थल बन्द भएपछि विकल्पमा साना जहाजले मेघौलीस्थित विमानस्थल प्रयोग गर्न सक्नेछन् ।
तर, मेघौली सुविधासम्पन्न विमानस्थल भने होइन । धावनमार्गको पीच बिग्रिएपछि त्यसलाई माथिबाट टालेर मर्मत गरिने भएको छ ।
यहाँ १२ सय मिटर लामो धावनमार्ग रहेको छ । भरतपुरमा बुद्ध, यति र सिम्रिक एयरलाइन्सको उडान हुने गरेको छ । बुद्ध र यतिले पोखरामा समेत उडान गर्छन् ।
