पेरिस । अर्जेन्टाइन स्टार लियोनल मेस्सीले छैटौं पटक बालोन डी’ ओर अवार्ड जित्दै कीर्तिमान राखेका छन् ।

जिवनमा खेलका माध्यमबाट अधिकांश रेकर्ड आफ्नो नाममा गराइसकेका उनले सन् २०१९ को उत्कृष्ट खेलाडी बन्दै उक्त अवार्ड जितेका हुन् ।

उनी अर्जेन्टिना र बार्सिलोनका कप्तान हुन् । फ्रान्सको पेरिसमा सोमबार राती सम्पन्न एक विशेष समारोहमा मेस्सीले क्रिस्टियानो रोनाल्डो, साडियो माने र भान डाइकलाई पछि पार्दै उक्त अवार्ड हात पार्न सफल भए ।

६ पटक बालोन डी’ओर अवार्ड जित्ने मेसी एक्लो खेलाडी बनेका छन् । उनले यसअघि २००९ देखि १२ सम्म र २०१५ मा गरी पाँच पटक यो अवार्ड जितिसकेका छन् । मेसीलाई रोनाल्डोले पच्छ्याएका छन् ।

उनको नाममा ५ अवार्ड रहेको छ । महिलातर्फ अमेरिकी खेलाडी मेगन रापोनीले उत्कृष्ट खेलाडीको अवार्ड जितिन् ।

लिभरपुलका एलिसन बेकर उत्कृष्ट गोलकिपर बने । विश्वभरबाट कप्तान, प्रशिक्षक तथा खेल पत्रकारले दिने मतका आधारमा यसको छिनोफानो हुने गर्छ ।

त्यसो त खेलाडीको प्रदर्शनलाई मूख्य आधार मानेर मनोनयनमा पर्ने गर्छन् ।