काठमाडौं । स्वरसम्राट नारायणगोपालले भौतिक शरीर छाडेको तीन दशक पुगेको छ । तर, उनका सिर्जना भने नेपालीका मन मुटुमा अझै पनि जीवन्त छन् ।

नेपाली संगीतका अमर व्यक्तित्व नारायणगोपाल गुरुवाचार्यको २९ औं स्मृति दिवस बिहीबार विविध कार्यक्रमसहित मनाइदैछ ।

नेपाली संगीतलाई उनले कैयौं वर्षसम्म मेट्न नसक्ने छाप छाडेर गएका छन् । त्यसकारण पनि हरेक जन्मजयन्ती तथा स्मृति दिवसमा स्वरसम्राटको सम्झना गर्ने गरिन्छ ।

बुबा आशगोपाल गुरुवाचार्य र आमा रामदेवीका कोखबाट उनको जन्म विसं १९९६ असोज १८ मा काठमाडौंमा भएको हो ।

उनको निधन भने विसं २०४७ मंसिर १९ मा ५१ वर्षकै उमेरमा भएको थियो । नारायणगोपाल संगीत कोषले उनको स्मृतिमा विविध कार्यक्रम आयोजना गर्दै आएको छ ।

नेपालमा हिन्दी संगितको दवदवा बढिरहेको समयमा नेपाली संगितलाई लोकप्रिय बनाउन उनले ठूलो योगदान गरेका छन् ।