काठमाडौं । संस्कृति, पर्यटन तथा नागरिक उड्डयन मन्त्री योगेश भट्टराईले बहुचर्चित राष्ट्रिय गौरवको आयोजना निजगढ विमानस्थलबारे छिट्टै महत्वपूर्ण निर्णय हुने बताएका छन् ।

प्रधानमन्त्री अस्पतालबाट डिस्चार्ज भएसँगै बस्ने मन्त्रीपरिषद्को बैठकबाट यस आयोजनालाई अगाडी बढाउने सम्बन्धमा महत्वपूर्ण निर्णय हुन लागेको उनले जानकारी दिए । यद्दपी उनले त्यसबारेमा भने विस्तृतमा खुलाएनन् ।

बिहीबार मन्त्रालयमा विभिन्न राजनीतिक दलका नेताहरुसँग नेपाल भ्रमण वर्षको तयारीका सम्बन्धमा आयोजित छलफल कार्यक्रममा उनले निजगढ विमानस्थलबारे रहेका अन्यौल हटाउने गरी पूर्वतयारीका काम अगाडी बढेको जानकारी दिए ।

सरकारको उच्च प्राथमिकतामा रहेको आयो आयोजनाले नेपालको पर्यटन र आर्थिक भविश्व निर्धारण गर्ने भन्दै उनले आयोजनालाई सबैको साथ र सहयोग रहेको समेत उल्लेख गरे ।

उक्त अवसरमा नेकपाका महासचिव विष्णु पौडेलले राष्ट्रिय आवश्यकताको आयोजना भएका कारण सामान्य विरोध भएपनि आयोजना नरोकिन स्पष्ट पारे ।

राष्ट्रिय जनता पार्टीका नेता लक्ष्मणलाल कर्णले यो आयोजना कुनै पनि हालतमा अगाडी बढाउनु पर्ने भन्दै त्यसका लागि उपयुक्त निर्णय लिन सरकारलाई सुझाव दिए ।