काठमाडौं । गौरिका सिंह नेपाली पौडी प्रतिस्पर्धामा चम्किलो नाम हो । राष्ट्रिय खेलकुदमा सबै खाले रेकर्ड तोडेर आफ्नो नाममा बनाइसकेकी यी खेलाडी यतिबेला सागमा चम्किरहेकी छिन् ।

उनले आइतबार ऐतिहासिक तेस्रो स्वर्ण जित्न सफल भएकी छिन् । एउटै सागमा तेस्रो स्वर्ण जित्ने उनी पहिलो नेपाली खेलाडी पनि बनेकी छिन् ।

उनले १३औं सागको पौडीतर्फ आइतबार ४०० मिटर फ्री स्टाइलमा स्वर्ण जिइने । उनले निर्धारित दुरी ४ मिनेट २५.२८ सेकेण्डमा पुरा गरेकी हुन ।

आइतबार नै सम्पन्न ५० मिटर ब्याकस्ट्रोकमा भने उनी रजत पदकमा सिमित भइन्। उनले पौडीको पहिलो प्रतिस्पर्धामा २०० मिटर फ्री स्टायल र दोस्रो दिन २०० मिटर ब्याकस्ट्रोकमा स्वर्ण जितेकी थिइन् ।

१०० मिटर ब्याकस्ट्रोकमा उनी रजत पदकमा सिमित भएकी थिइन् । ४०० मिटर फ्री स्टाइलमा गौरिका सहितको टिमले काश्य पदक जितेको थियो ।

यससँगै १३औं सागमा गौरिकाको नाममा मात्र तीन स्वर्ण, एक रजत र एक काश्य गरी ५ पदक पुगेको छ । गौरिका बेलायतमा हुर्किएकी नेपाली चेली हुन् ।

काठमाडौंमा जन्मिएकी उनी बुवा पारस सिंह र आमा गरिमा राणाका साथ २ वर्षको उमेरमै बेलायती पुगेर उत्रै हुर्किएकी हुन् ।

यी चेलीले आफ्नो समर्पण भने सधैभरी नेपालकै लागि भएको बताएकी छिन् । उनले १२ औं सागबाटै अन्तर्राष्ट्रिय प्रतियोगितामा नेपालको प्रतिनिधित्व थालेकी थिइन् ।