काठमाडौं । कांग्रेसका वरिष्ठ नेता रामचन्द्र पौडेल पक्षले आफ्नो अडान यथावत राख्दै अनुपस्थित भएपछि नेपाली कांग्रेस केन्द्रीय कार्यसमिति बैठक स्थगित भएको छ ।

बैठक सोमबारका लागि डाकिएको थियो । तर, बैठक बस्दै नबसी स्थगित गरियो । बैठक बस्न संस्थापन पक्षका नेता भने पार्टी कार्यालय पुगेका थिए ।

पौडेललाई फकाउन देउवा आफै शनिबार पौडेल निवास पुगेका थिए । तर, सहमति हुन सकेन ।

सोमबार पनि उपसभापति विमलेन्द्र निधिले पौडेल समूहका नेतासँग भेटवार्ता गरेका थिए । तर, सहमति भने भएन ।

पौडेल समूहले १४ औं महाधिवेशनको कार्यतालिका नल्याएसम्म बैठकमा नबस्ने अडान लिएको छ । पौडेलको अडानले देउवा भने समस्यामा परेका छन् ।