काठमाडौं । यातायात व्यवस्था विभागले नेपालमा ट्राफिक नियम उल्लंघन गर्नेका लागि पहिलो पटकमै ५ हजार रुपैयाँ जरिवानाको नियम ल्याउने तयारी गरेको छ ।

संघीय सवारी तथा यातायात व्यवस्था ऐनको मस्यौदा बनिरहेको छ । ऐनमा उक्त विषय उल्लेख गरिएको विभाग स्रोतले जनाएको छ ।

बन्दै गरेको ऐनको मस्यौदामा ट्राफिक नियम उल्लंघन गर्नेलाई ५ हजार जरिवानाको प्रस्ताव गरिएको बताइएको छ ।

पछिल्लो समय दूर्घटना बढिरहेको छ । यसमा चालकको लापरवाहीका कारण धेरै दूर्घटना हुने गरेको पाइएको छ ।

जरिवाना रकम कम हुँदा धेरैले वेवास्ता गर्ने गरेको निष्कर्ष सरकारको छ । विभागले प्रस्तावित ऐनको विधेयक बनाउने विषयलाई लिएर सात वटै प्रदेशका विभागीय मन्त्री र सचिवसँग छलmलको तयारी समेत गरेको छ ।

त्यसपछि ऐनको ड्राफ्ट भौतिक पूर्वाधार तथा यातायात मन्त्रालय जानेछ । मन्त्रालयले सम्बन्धित सरोकारवाला निकाय र मन्त्रालयबाट राय तथा स्वीकृति लिएर संसदमा लैजाने भएको छ ।

अहिले ट्राफिक नियम उल्लंघन गर्दा ट्राफिक प्रहरीले कसुर हेरेर ५ सय देखि १५ सयसम्म मात्र जरिवाना गर्ने प्रावधान रहेको छ ।

नयाँ प्रावधान आएमा भने लेनक्रस, ओभर स्पिड, जिकज्याकजस्ता सामान्य ट्राफिक कसुरमा समेत पहिलो पटकमै ५ हजार जरिवाना लाग्नेछ ।

भारतमा हालै ट्राफिक जरिवाना ठूलो परिमाणमा बढाएर कार्यान्वयनमा आएको छ । यसले दूर्घटना न्यूनिकरणमा सहयोग पुग्ने अपेक्षा लिइएको छ ।