काजकस्तान । काजकस्तानस्थित अल्माती एयरपोर्ट नजिक भएको यात्रुवाहक विमान दुर्घटनामा कम्तिमा १५ जनाले ज्यान गुमाएका छन ।

६० भन्दा बढी घाइते भएका अन्तर्राष्ट्रिय संचारमाध्यमले उल्लेख गरेका छन् । एयरपोर्ट अधिकारीका अनुसार विमानमा ९८ जना सवार रहेका थिए। त्यसमध्ये ९३ जना यात्रु र ५ जना चालक दलका सदस्य रहेको उल्लेख छ ।

‘बेक एयर’ को जेड ९२१०० जहाज अल्माती शहरबाट राजधानी नुर सुल्तानतर्फ जाने क्रममा दुर्घटनामा परेको हो ।

जहाज उड्ने बित्तिकै बिहान ७ बजेर २२ मिनेटमा सन्तुलन गुमाएको थियो । त्यसपछि जहाज दुई तले ठोक्किएको थियो ।

दुर्घटनाग्रस्त जहाजबाट दर्जनौलाई उद्दार गरिएको छ । त्यसमध्ये ८ जना बालबालिका समेत छन् ।

दुर्घटना भएको स्थानमा बाक्लो हुस्सु र भूईमा हिँउ थियो ।

दुर्घटनाको कारण खुलिसकेको छैन । कजाकस्तानका राष्ट्रपति कासम जोमार्टले जहाज दुर्घटनाबारे छानबिन गर्न आयोग गठन गरेका छन् । ज्यान गुमाउनेमा ६ जना बालबालिका छन्।