काठमाडौं । राजधानीमा जारी शहीद स्मारक ए डिभिजन लीग फुटबलका खेलहरु आजबाट सातदोबाटोस्थित एन्फा कम्प्लेक्समा संचालन हुँदैछन् ।

नेपाल भ्रमण वर्षको उद्घाटनका दौरान रंगशालामा तयारी शुरु भएका कारण ए डिभिजन लीगका खेल सातदोबाटो सार्नु परेको अखिल नेपाल फूटबल संघ (एन्फा)ले जानकारी दिएको छ ।

लीगमा सोमबारबाट चौथो चरणका खेल सुरु हुँदैछन्। चौथो चरणका खेल अन्तर्गत पहिलो खेलमा सोमबार मच्छिन्द्र क्लब र न्युरोड टिम एनआरटी भिड्दै कार्यक्रम रहेको छ ।

सोही मैदानमा दोस्रो खेलमा फ्रेन्ड्स क्लब र मनाङ मस्र्याङ्दी क्लब भिड्दैछन्।

तेस्रो चरणका खेल सकिदासम्म मनाङ आफ्ना सबै खेलमा जित निकाल्दै ९ अंकसहित तालिकाको शीर्ष स्थानमा रहेको छ। थ्रीस्टार २ खेलमा जीत र एक बराबरी खेल्दै दोस्रो स्थानमा छ ।