कल्पना घिमिरे

न्यूयोर्क/अमेरिका

एउटा प्रतिध्वनि लिम्पियाधुराको भीर पहराबाट…
लुटतन्त्रको आगोमा शिशु लोकतन्त्र पोलिदिएकै छु (२)
सीमा छ बिक्री किस्ताबन्दीमा, मेची महाकाली खोलिदिएकै छु ।
किन बहुलाउँछन् निरिह नेपाली फलाक्दै ‘कालापानी’ ? (२)
‘एक इन्च जमिन छोडिदैन’ हावा कुरो बोलिदिएकै छु ।।

सीमा मिचिएको विषयमा अत्यन्तै चिन्ता ब्यक्त गर्दै साहित्यकार मधु माधुर्यले बाचन गरेको मुक्तक हो यो । नेपाल मुक्तक प्रतिष्ठान अमेरिका शाखाले गत शनिबार आयोजना गरेको मुक्तक वाचनमा सहभागी केही साहित्यकारहरुले नेपालको पूर्वी सीमाना लिपुलेक, कालापानी र लिम्पियाधुरा मिचिएको बारे निकै रोचक ढंगले सरकारलाई कडा ब्यङ्ग गरे । २ लाइनको छोटो तर अनगिन्ति शब्द अटाउने सन्देश बोकेका मुक्तक बाचन गरिरहँदा कार्यक्रममा सहभागीहरुको वाहवायी गुञ्जिएको थियो । अर्का साहित्यकार गोबिन्द कोइरालाले लिम्पियाधुरालाई यसरी ब्यङग्य गरे ।

महको लोभमा फसेको झिँगो, किन हेथ्र्यो र धारिलो छुरा,
झिँगो फसाउन साह्रै सिपालु जालो बुन्दै छ माकुरा,
निदाएको बहानामा रातभरी खुसुर–पुसुर गर्दै
बालुवाटार मै टार घोक्नु छ, ‘छु मतलब’ त्यो लिम्पियाधुरा ?

कार्यक्रममा सहभागी हुन अमेरिकाका बिभिन्न राज्यबाट आएका साहित्य अनुरागीहरुले मुक्तक सुनाएका थिए । बोस्टन, न्यु ह्याम्पसायर, न्युजर्सी, नर्थ क्यारोलिनाबाट साहित्यकारहरुको सहभागिता थियो । बरिष्ठ कानुनविद् विनोद रोक्का, डा.गोविन्द कोइराला, डा.मधु माधुर्य, पुष्कर बराल, एनबी दाहाल, यादब गौतम, राजन महर्जन , शारदा क्षेत्री, तुलसी चित्रकार, कृष्ण कुसुम, विकास विष्ट, गोबद्र्धन पुजा, मिलन शाही लगायतले सुनिरहुँ लाग्ने मुक्तक सुनाएका थिए ।
कार्यक्रममा अन्तराष्ट्रिय साहित्य समाज बोर्डको नवगठित कार्यसमितिका अध्यक्ष गीता खत्री, अन्तराष्ट्रिय नेपाली साहित्य समाज न्यूयोर्क च्याप्टरकी अध्यक्ष शकुन ज्ञवाली लगायत सबै बोर्ड सदस्यहरुलाई प्रतिष्ठानका तर्फबाट सम्मान गरिएको थियो । मदन पुरस्कार बिजेता ‘योगमाया’ पुस्तककी लेखक निलम कार्की निहारिकालाई बिशेष सम्मान गरिएको थियो । कार्यक्रमका प्रमुख अतिथि नेपाली महावाणिज्यदूत पुष्पराज भट्टराई र प्रतिष्ठानका अध्यक्ष आनन्द श्रेष्ठले खादा र प्रमाणपत्रले साहित्यकारहरुलाई सम्मान गरेका थिए ।

कार्यक्रममा बोल्दै नेपाली महावाणिज्यदूत भट्टराईले बिदेशमा रहेर हाम्रो धर्म, साहित्य, कला संस्कृतिबारे अमेरिकामा हुर्किरहेका बालबालिकालाई सिकाउन प्रष्तिष्ठानले मुख्य भूमिका खेल्न आग्रह गरे । साथै नेपाली साहित्यलाई विश्वभर फैलाउनुपर्नेमा जोड दिए ।
प्रतिष्ठानका महासचिब ज्योतिकुमार श्रेष्ठले साहित्यका बिभिन्न पाटाहरुसंग जोडिदै प्रतिष्ठानले बिशेष गरी मुक्तक लेख्ने साहित्यकारहरु संग नजिक रहेर काम गर्ने बताए ।
कार्यक्रममा बिभिन्न विषयबस्तु बारे मुक्तक सुनाइएको थियो । कतिपय साहित्यकारहरुले सामाजिक सञ्जाल फेसबुकले हाम्रो समाजमा भित्र्याएका बिकृति र बिसंगतिमाथि ब्यङ्ग्य गरेका थिए । फेसबुकलाई ब्यङग्य गर्दै सारदा श्रेत्री भन्छिन्,
फेसबुकको साथी न–जन्ति न–मलामि बन्छन् रे ।
कति कमेन्ट कति लाइक आएछ भनि गन्छन रे ।।
इन्टरनेटको जमानाले पनि के के गर्यो हजुर ।
उपस्थिति बिना श्रद्धाञ्जली दिँए भन्छन् रे ।।