काठमाडौं । सत्तारुढ नेपाल कम्युनिष्ट पार्टीले शुक्रबार राष्ट्रियसभा निर्वाचन प्रयोजनका लागि उम्मेदवार छनोट गरेको छ ।

नेकपाका प्रवक्ता नारयणकाजी श्रेष्ठसहित पूर्वमाओवादीबाट ७ र पूर्वएमालेबाट ९ जना पर्ने गरी उमेदवारको टुंगो लागेको छ ।

नेकपाले राजपासँग तालमेल गरेको छ । दुई जना राजपाबाट उमेदवार हुनेछन् । नेकपाले भने १६ जना उम्मेदवार तोकेको हो ।

निर्वाचन आयोगको तालीका अनुसार राष्ट्रियसभाको उम्मेदवारी मनोनयन २० पुस र चुनाव ९ माघमा तोकिएको छ ।

५९ सदस्यीय राष्ट्रियसभा सदस्यमध्ये १८ जना सदस्यको दुई वर्षे कार्यकाल २० फागुनबाट सकिदैछ ।

राष्ट्रियसभा सदस्यको पदावधि सकिनु ३५ दिनअगाडि नै चुनाव गरिसक्नुपर्ने कानुनी प्रावधान रहेको छ ।

राष्ट्रियसभाका एक तिहाइ सदस्यको पदावधि प्रत्येक दुई वर्षमा समाप्त हुन्छ ।

दुई वर्षे कार्यकाल पुरा गरी सरिता प्रसाई, सुरेन्द्रराज पाण्डे, हरिचरण शिवाकोटी, रामप्रीत पासवान, बिन्दादेवी आले, वृषेशचन्द्रलाल, बद्रीप्रसाद पाण्डे, बलरामप्रसाद बाँस्कोटा, मीना बुढा, मुक्ताकुमारी यादव, डा. युवराज खतिवडा, युटोल तामाङ, रमेशप्रसाद यादव, राजकुमार यादव, दुर्गाप्रसाद उपाध्याय, धनकुमारी खतिवडा, कमलाकुमारी ओली, कालीबहादुर मल्ल र खेमराज नेपाली  बिदा हुँदैछन् ।

नेकपाले प्रदेश १ बाट इन्दु गौतम, गोपी अच्छामी र देवेन्द्र दाहाललाई उमेदवार बनाएको छ ।

प्रदेश २ प्रदेश २ मा नेकपा र राजपाले दुई दुई सीट लिँदा नेकपाको तर्फबाट राधेश्याम पासवान र तुलसा दाहाल उम्मेदवार बन्ने छन् ।

प्रदेश ३ मा नेकपाले डा. बेदुराम भुसाल र गंगा बेलवासेलाई उम्मेदवार बनाएको छ ।

गण्डकी प्रदेशबाट नेकपाका प्रवक्ता नारायणकाजी श्रेष्ठ र भगवती न्यौपाने उठ्ने छन् ।

प्रदेश ५मा बिमला घिमिरे, जगप्रसाद शर्मा र गोपाल भट्टराई उमेदवार बनेका छन् । कर्णाली प्रदेशमा मायाप्रसाद शर्मा, सुमित्रा बिसी उम्मेदवार बन्ने भएका छन् ।

सुदूरपश्चिम प्रदेश सुदूरपश्चिम प्रदेशबाट शारदा भट्ट र तारामान स्वाँर उम्मेदवार बनेका छन् ।