बगदाद । इराकको राजधानी बगदादस्थित अमेरिकी दूतावास तथा सेनाको इलाका नजिकै रकेट आक्रमण भएको छ ।

अमेरिकी अधिकारीहरुले यसको पुष्टी गरेका छन् । अमेरिकी दूतावास नजिकैको ग्रीन जोन, बगदाद नजिकैको जदरिया र अमेरिकी सुरक्षाबल भएका बलाद एयरबेसमा रकेट आक्रमण भएको बताइएको छ ।

अमेरिकाले इरानका सैन्य कमान्डर कासिम सुलेमानीलाई ड्रोन आक्रामण गरी बगदादमा मारेपछि फेरी इराकमा हिंसा भड्किएको हो ।

इरानले यस आक्रमणको शक्तिशाली बदला लिने चेतावनी दिइसकेको छ । इरान र अमेरिकाबीचका द्धन्द्धले मध्यपूर्वी एसिया फेरी एकपटक त्रसित भएको छ ।

पछिल्लो हमलाबाट कसैको ज्यान भने नगएको अमेरिकी सेनाले जनाएको छ ।

इरान समर्थित मिलिशिया लडाकूबाट यस्तो आक्रमण भएको अनुमान अमेरिकाको छ ।

अन्तर्राष्ट्रिय संचारमाध्यमहरुका अनुसार रकेट ग्रीन जोन नजिकै जदरिया र अमेरिकी सुरक्षाबल भएको एयरबेसमा खसेको पुटी इराकी प्रहरीले समेत गरेको छ ।