काठमाडौं । अन्तराष्ट्रिय बजारमा सुनको मूल्यमा आएको उतारचढावले नेपालमा समेत नकारात्मक प्रभाव पारेको छ ।

पछिल्लो समय इरान र अमेरिकाबीच बढ्दो युद्धको खतराका कारण अन्तर्राष्ट्रिय बजारमा सुनको भाउ अधिक बढेको छ ।

त्यसको प्रभाव आइतबार नेपाली बजारमा समेत देखियो । नेपालमा सुनको मूल्य आइतबार इतिहासकै सर्वाधिक विन्दुमा पुग्यो ।

यसअघि ७३ हजार ५ सय सबै भन्दा उच्च बिन्दुमा रहेको सुनको भाउले आइतबार ७५ हजार ५ सयको आँकडा छोएको हो ।

नेपाल सुनचाँदी व्यवसायी महासंघका अनुसार आइतबार छापावाल सुनको प्रतितोला मूल्य ७५ हजार ५ सय तोकिएको छ ।

तेजावी सुनको मूल्य सुनको प्रतितोला मूल्य ७५ हजार २ सय रहेको छ । चाँदी प्रतितोला ९ सय रुपैयाँमा किनबेच भएको छ ।

अघिल्लो शुक्रबार ७४ हजार ५ सय रुपैयाँमा कारोबार भएको थियो । आइतबार मात्र एक हजार रुपैयाँले बढेर कीर्तिमानी मूल्यमा पुगेको हो ।

तेजावी सुनमा पनि एक हजार रुपैयाँ नै भाउ बढेको छ । विश्व बजारमा अमेरिका र इरानको द्धन्द्धले नराम्रोसँग प्रभाव पारेको छ ।

यसको मारमा नेपाली उपभोक्ता समेत परेका छन् ।