काठमाडौं । नेपालमा गैरकानूनी रुपमा बसिरहेका १ सय २२ जना चिनियाँ नागरिकलाई बुधबार स्वदेश फिर्ता पठाइदैछ । उनीहरुलाई लिन बुधबार चिनियाँ सुरक्षा अधिकारीहरु नेपाल आउँदैछन् ।

नेपालमा बसेर चीनविरुद्ध अपराध गरेको अभियोगमा चीन सरकारकै सहयोगमा उनीहरुलाई पक्राउ गरिएको थियो ।

नेपाल प्रहरीको अनुसन्धानले उनीहरुलाई आपराधिक पृष्ठभूमिमा भेटेको थिएन् ।

तर, अध्यागमन सम्बन्धी कानून भने उनीहरुले उल्लंघन गरेका कारण नेपालले देश निकाला गर्न सक्ने कानूनी प्रावधान भने रहेको थियो ।

चिनियाँ नागरिकलाई जिल्ला प्रशासन कार्यालय काठमाडौंले जनही १ हजार धरौटीमा रिहा गर्न आदेश गरेलगत्तै अध्यागमनको जिम्मा लगाइएको थियो ।

धरौटी रकम भने चिनियाँ दूतावासले तिरिदिएको छ । बुधबार ८८ र ३४ जनाका दुई समूह बनाएर ‘चाइना साउदर्न’ र ‘चाइना वेस्टर्न’का जहाजबाट चिनियाँ नागरिकलाई चीन फर्काउने तयारी छ ।

कानून अनुसार अब उनीहरु कम्तिमा ४ वर्ष नेपाल आउन पाउने छैनन् ।