काठमाडौं । काठमाडौंको अनामनगरमा प्रहरीको गाडी ट्राफिक कारवाहीमा परेको छ । सोमबार ट्राफिक प्रहरीले प्रहरीकै गाडीमा ह्विल लक गरेको हो ।

महानगरीय ट्राफिक प्रहरी रामसाहपथको टोलीले प्रहरीको ना१झ १४२५ नम्बरको गाडीमा ह्विल लक गरेको हो ।

सडक नै ढाकेर रोकेर राखिएको उक्त गाडीलाई कारवाही गरिएको महानगरीय ट्राफिक प्रहरी महाशाखाको भनाई छ ।

उक्त गाडीलाई सर्वसाधारणलाई लाग्ने नियमसरह चिट काटेर कारबाहीको दायरामा ल्याइएको हो ।

नेपालमा पछिल्लो समय ट्राफिक प्रहरीले गल्ती गर्ने सबै प्रकारका सवारी साधनलाई कारवाही गर्न थालेको छ ।

यसअघि भौतिक मन्त्री र गृह मन्त्रालयका सहसचिवको सवारीमा समेत ट्राफिक प्रहरीले ह्वील लक लगाइसकेको छ ।